Armaniston Turkiya bilan chegaralarni ochishga va diplomatik munosabatlarni qayta tiklashga tayyor. Bu haqda Armaniston tashqi ishlar vaziri Ararat Mirzoyan Anadolu axborot agentligiga ma’lum qilgan.
“Armaniston aholisining asosiy qismi Turkiya bilan munosabatlarning me’yorlashuvini istaydi”,— degan Mirzoyan turkiyalik hamkasbi Mevlyud Chavushog‘lu bilan uchrashuvda.
Armaniston TIV rahbari mamlakatda o‘tkazilgan ijtimoiy so‘rovnomalarda ham ikki davlatning yaqinligi tiklanishini yoqlab ovoz berilganini qayd etgan.
Armaniston vakili arman jamiyatida ham turklarda ham muayyan guruhlar munosabatlarning me’yorga kelishiga qarshilik qilishini bildirgan. U ikki mamlakatning rasmiy shaxslari mazkur masalani hal etishda siyosiy iroda namoyish qilishi zarurligini ta’kidlagan.
“Turkiya tashqi ishlar vaziri Chavusho‘g‘lu bilan uchrashuvda biz ayrim ta’sirchan vaziyatlar yuzasidan fikr almashdik va men kelgusida ushbu jihatlar inobatga olinishiga umid qilaman”,— deya muzokaralar haqida gapirgan Mirzoyan.
2022-yil yanvar oyida Armaniston hamda Turkiya maxsus vakillari ikki tomonlama munosabatlarni qayta tiklash borasida Moskvada birinchi uchrashuvini o‘tkazgan va bu do‘stona aloqalar tiklanishining belgisi bo‘lgandi.
Eslatib o‘tamiz, Turkiya Armaniston bilan yerusti va havo chegaralarini 1993-yilda Tog‘li Qorabog‘ nizosi tufayli yopgandi.
Izoh (0)