“Qishloq xo‘jaligi ekinlari urug‘chiligini yanada rivojlantirish bo‘yicha qo‘shimcha chora-tadbirlar to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qaror bilan Urug‘chilikni rivojlantirish markaziga bir qator qo‘shimcha vazifalar yuklatilgan. Markaz paxta, boshoqli don, sabzavot, poliz, moyli, dukkakli va ozuqa ekinlari urug‘liklarini ichki va tashqi bozorga Uzbek seeds milliy brendi asosida sotishni tashkil etadi.
Shuningdek, “O‘zpaxtasanoat”ning 11 ta urug‘lik chigit tayyorlash sexlari markazga berildi. Urug‘lik tayyorlash sexlarini markazga o‘tkazish bo‘yicha idoralararo ishchi guruh tasdiqlangan.
Urug‘lik chigit va urug‘lik don tayyorlash sexlarini 2022—2023-yillarda to‘liq modernizatsiya qilish bo‘yicha “yo‘l xaritasi” ishlab chiqiladi (uning ijrosiga 26,5 million dollar yo‘naltiriladi).
Hujjatda qayd etilishicha, 2022—2025-yillarda paxta hosildorligi 50 sentnerga, boshoqli don 90 sentnerga yetkaziladi. 200 ming gektar sug‘oriladigan yer qishloq xo‘jaligi ekinlari urug‘liklarini yetishtirishga ixtisoslashtiriladi.
Agroklasterlar va fermer xo‘jaliklariga g‘o‘za va boshoqli don ekinlarining eng hosildor navlarini import qilishga, ularni mustaqil joylashtirishga ruxsat beriladi.
Eslatib o‘tamiz, O‘zbekiston odam savdosi va majburiy mehnatga qarshi kurashish bo‘yicha AQShning 2021-yilgi hisobotida 2-guruh maxsus kuzatuv ro‘yxatidan 2-kuzatuv ro‘yxatiga ko‘tarilgandi. Mazkur hisobotda O‘zbekiston hukumatining paxta yig‘im-terimida majburiy mehnatning oldini olish, majburiy mehnatga qarshi qonunlar buzilishini aniqlash hamda qonunbuzarlarni javobgarlikka tortishga oid sa’y-harakatlari e’tirof etilgan.
Ma’lumot uchun, uzoq yillar davomida paxta terimi mavsumida bolalar va majburiy mehnatdan foydalanilgani bois O‘zbekiston paxtasi xalqaro jamoatchilik tomonidan “qora ro‘yxatlar”ga kiritilgan, yetakchi ishlab chiqaruvchilar O‘zbekiston paxtasini boykot qilgan edi. Xalqaro mehnat tashkilotining Vashingtondagi ofisi direktori Kevin Kassidi esa o‘zbek paxtasi boykotini asossiz deb e’lon qilgandi.
Izoh (0)