Ijtimoiy tarmoqlarda O‘zbekiston Xalq ta’limi vazirligi o‘qituvchilardan ota-onalarni elektron kundalik obunasini uzaytirishga majburlashini talab qilayotgani haqida ma’lumot paydo bo‘ldi. Vazirlik matbuot xizmati bunday ma’lumotlar yuzasidan izoh berdi.
“Xalq ta’limi vazirligi ‘Kundalik’ tizimiga obuna bo‘lish ota-onalar uchun ixtiyoriyligicha qolayotganini eslatib o‘tadi. Xalq ta’limi vazirligi tomonidan o‘qituvchilarga ota-onalardan obunani uzaytirishni talab qilish bo‘yicha og‘zaki yoki yozma buyruq berilmagan”, — deyiladi vazirlik bayonotida.
Ayni vaqtda, vazirlik matbuot xizmatining qayd etishicha, elektron jurnal va kundaliklardan foydalanadigan maktab o‘qituvchilari “Ta’lim to‘g‘risida”gi qonunga muvofiq ota-onalarga farzandlarining tarbiyasi hamda umumiy o‘rta ta’lim olishlari uchun mas’uliyatlari doirasida obunani uzaytirishni eslatish huquqiga egadirlar.
Shuningdek, vazirlik 2020/2021-o‘quv yilida ‘Kundalik’ tizimiga obuna narxi oyiga emas, yiliga 8600 so‘mni tashkil etishini eslatib o‘tgan — bu pulga platformaning barcha funksiyalaridan foydalanish mumkin. “Boshqa hech qanday alohida to‘lov amalga oshirilmaydi”, — deyiladi vazirlik bayonotida.
O‘zbekiston maktablarida “Kundalik” elektron tizimini tatbiq etish 2019-yildan boshlangan edi. Boshlang‘ich davrda tizimdan foydalanish bepul bo‘lgan, 2020-yil noyabridan pullik tartibga o‘tgan. O‘shanda tizimdan bir yillik foydalanish bahosi bir o‘quvchi uchun 9200 so‘m edi.
Ushbu tizimning tatbiq etilishi o‘qituvchi va ota-onalarning barchasi tomonidan ham birdek iliq kutib olinmagan. Xususan, Xalq ta’limi vazirligi tomonidan taklif etilayotgan pullik kundalik tizimi bolalarning bepul ta’lim olish huquqiga daxl qilmaydimi, degan masala muntazam kun tartibiga chiqib turadi.
Izoh (0)