Bloger Jeyk Pol boks qoidalari bo‘yicha o‘tgan jangda UFC sobiq chempionini dahshatli nokautga uchratdi

AQShning Florida shtatida Toshkent vaqti bilan 19-dekabr tongida boks kechasi bo‘lib o‘tdi.

Musobaqaning asosiy voqeasi YouTube bloger Jeyk Pol va UFC sobiq chempioni Tayron Vudli o‘rtasidagi revansh jangi bo‘ldi.

Dastlabki uch raund faol kurashlarga boy bo‘ldi va asosan Jeykning zarbalari bilan yodda qoldi. 4–5-raundlarda temp pasayib ketdi. 6-raundga kelib Pol kuchli o‘ng qo‘l zarbasi bilan raqibini chuqur nokaut holatiga tushirdi.

Shu tariqa bloger ikkinchi jangda ham Vudlidan ustun keldi. Ular o‘rtasidagi dastlabki jang 2021-yilning avgust oyida bo‘lib o‘tgan va unda Jeyk Pol ochkolar hisobiga g‘alaba qozongandi.

Qayd etish kerak, Vudli revansh jangiga qisqa muddat tayyorgarlik ko‘rdi. Aslida Pol Tommi Fyuriga qarshi jang o‘tkazishi kerak edi. Biroq Fyuri jarohat sabab jangdan voz kechgandi.