Toshkentda avtobusga borib urilgan Lacetti haydovchisi voqea joyida vafot etdi

Toshkent shahrining Yakkasaroy tumanida Lacetti to‘xtab turgan avtobusga urildi, deya xabar qilmoqda shahar IIBB axborot xizmati.

Ma’lum qilinishicha, 27-oktabr kuni, taxminan, soat 00:10 da Yakkasaroy tumani Shota Rustaveli ko‘chasidagi “Hosilot” mehmonxonasi yaqinida Lacetti rusumli avtomobilni (davlat raqami 01 A 833 HB) ishonchnoma asosida boshqarib borgan 1996-yilda tug‘ilgan M.M. boshqaruvni yo‘qotib, yo‘l chetida to‘xtab turgan 1964-yilda tug‘ilgan Sh.X. boshqaruvidagi Mercedes-Benz (davlat raqami 10 973 JAA) avtobusiga borib urilgan.

To‘qnashuv oqibatida Lacetti haydovchisi voqea joyida hayotdan ko‘z yumgan.

Mazkur fakt bo‘yicha Toshkent shahar IIBB xodimlari tomonidan tergov oldi tekshiruvi olib borilmoqda.

Ijtimoiy tarmoqlarda tarqalgan xabarlarga ko‘ra avtobus OKMK futbol klubiga tegishli bo‘lgan.

Bundan avval Toshkentda Matiz yo‘l chetida turgan uch nafar piyodani urib yuborib, ag‘darilgani, Qashqadaryoda Nexia va Damas ishtirokida sodir bo‘lgan YTH oqibatida uch kishi halok bo‘lgani hamda Qashqadaryoda Nexia va Captiva to‘qnashuvi oqibatida ikki haydovchi vafot etgani haqida xabar berilgandi.