Bandlik va mehnat munosabatlari vazirligi ijtimoiy tarmoqlarda tarqalgan Bo‘ston tumani hokimi o‘rinbosari o‘z uyida obodonlashtirish xodimlarini ishlatgani tasvirlangan video bo‘yicha rasmiy ma’lumot berdi.
Ijtimoiy tarmoqlarda “Andijon viloyati Bo‘ston tumani hokimi muovini o‘z uyida obodonlashtirish ishchilarini majburan ishlatdi” mazmunida xabar tarqalgan. Ma’lum qilinishicha, holat yuzasidan Andijon viloyati Bandlik bosh boshqarmasi davlat mehnat inspeksiyasi tomonidan o‘rganish o‘tkazilgan.
O‘rganishlar davomida aniqlanishicha, tuman hokimi o‘rinbosari tomonidan Obodonlashtirish boshqarmasi ishchilari soya donini quritish va tozalash ishlariga jalb etilgan.
Shu sababli Ma’muriy javobgarlik to‘g‘risidagi kodeksning 51-moddasi (mehnatga ma’muriy tarzda majburlash) 1-qismiga asosan bazaviy hisoblash miqdorining 50 barobari miqdorida (13,5 million so‘m) ma’muriy jarima qo‘llanilgan.
Avvalroq Andijon viloyati Qo‘rg‘ontepa tumani prokurori Sardor Rajabboyev tuman Obodonlashtirish boshqarmasi xodimlarini shaxsiy hovlisida ishlashga majburlagani sabab ishdan olingani to‘g‘risida xabar berilgandi.
Izoh (0)