AQShning Los-Anjeles shahrida maslahatchilar ishtirokidagi sud majlisi millioner Robert Dyorstni uning do‘sti Syuzan Bermanga nisbatan 2000-yilda amalga oshirilgan qotillikda aybdor deb topdi.
Maslahatchilar Dyorstga nisbatan birinchi darajali qotillik ayblovi isbotlangan deb topdi. Ularning xulosasiga ko‘ra, Dyorst 1982-yilda uning o‘z rafiqasi g‘oyib bo‘lishiga aloqadorligi haqida aytib berishidan qo‘rqib, Bermanni o‘ldirgan. Dyorst o‘z xotinining o‘limida gumon qilingan, biroq dalillar yo‘qligi sababli unga ayblov e’lon qilinmagan. Berman millionerning yaqin do‘sti bo‘lgan, o‘ldirib ketilishidan avval politsiya uni yana bir marta so‘roq qilmoqchi bo‘lgan.
78 yoshli Dyorstning o‘zi sud majlisida qatnashmadi — u koronavirus bilan kasallangan odam bilan muloqot qilgach, qamoqxonada izolyatsiyaga olingan.
Dyorstga nisbatan hukm 18-oktabrda chiqariladi. U muddatidan oldin ozod qilish huquqisiz umrbod qamoq jazosiga mahkum qilinishi mumkin.
Bermanning o‘ldirib ketilishi haqidagi jinoyat ishi Dyorstning hayotiga bag‘ishlangan “La’nat” (The Jinx) hujjatli serial suratga olinganidan keyin ochildi. Jurnalist bilan bo‘lgan suhbatdan keyin millioner hojatxonaga kirib, o‘z-o‘zi bilan gaplasha boshlagan — bu vaqtda uning mikrofoni o‘chirilmagan edi. “Jin ursin, o‘zi men nima qildim? Ularning hammasini o‘ldirdim, albatta”, — degan u shu jumladan. Suratga olish guruhi ushbu audioyozuvni hamda serial ustida ishlash chog‘ida to‘plangan boshqa dalillarni politsiyaga olib borgan.
2001-yilda Dyorst o‘zi bilan qo‘shni bo‘lib yashagan odamni o‘ldirgan. Ushbu qotillik uchun u sudlangan, ammo sud maslahatchilari uni o‘zini o‘zi mudofaa qilish zarurati doirasida harakat qilgan, deb topgan.
Izoh (0)