Toshkentning Chilonzor tumanida @inkuzart taxallusi bilan ijod qilayotgan ko‘cha rassomi Abdurahmon 4-sentabr kuni UzAuto Motors kompaniyasining monopoliyasiga atab strit-art chizgan edi. Ijodkor o‘zining Telegram kanali orqali ushbu strit-artning katta qismi o‘chirib tashlanganini ma’lum qildi.

Foto: Telegram / @inkuzart

Ko‘cha rassomining ijod namunasida Chevrolet savdo belgisi ostida avtomobillar ishlab chiqaruvchi UzAuto Motors kompaniyasi monopoliyasiga ishora qilib, mashina olish uchun uzun navbat aks ettirilgan. Shuningdek, navbat boshida turgan insonning qizil bosh kiyimi “shapka” tizimiga ishora qiladi.

5-sentabr kuni ijtimoiy tarmoqlarda mazkur strit-artni o‘chirish bo‘yicha ishlar olib borilayotgani tasvirlangan video tarqaldi. Keyinroq “Daryo” muxbiri voqea joyiga borib, strit-artni o‘chirish harakati muvaffaqiyatsiz tugaganini ma’lum qilgandi. Keyinroq @inkuzart Telegram’dagi kanalida strit-artning katta qismi oq bo‘yoq yordamida o‘chirib tashlangani tasvirlangan fotosuratni e’lon qildi.

“Gazeta.uz”ning yozishicha, UzAuto Motors kompaniyasi tomonidan 2021-yilning yanvar—iyul oylarida 124,9 ming dona yoki o‘tgan yilning shu davriga nisbatan 25,9 foiz yoxud 43,8 mingta kamroq yengil avtomobil ishlab chiqargan. Ishlab chiqarish hajmi kamayishiga global miqyosda mikrochiplar taqchilligi sabab qilib ko‘rsatilgan.

Ta’kidlash kerakki, UzAutoSavdo ma’lumotlariga ko‘ra, ayni vaqtda Lacetti xarid qilish uchun navbatda turganlar soni 31 mingga, Cobalt uchun 11 mingga yetgan.

Avgust oxirida Prezident Shavkat Mirziyoyev tadbirkorlar bilan ochiq muloqotda Asakadagi avtomobil zavodida ishlab chiqarilgan avtomobillar eksportga ichki bozorga nisbatan 30−40 foiz arzonroqqa sotilganini tan oldi. Uning so‘zlariga ko‘ra, kelgusida raqobat muhitining shakllanishi, Toshkent, Namangan va Jizzax viloyatlarida yangi zavodlar qurilishi natijasida avtozavod o‘z faoliyatini tubdan qayta ko‘rib chiqishiga to‘g‘ri keladi.