So‘nggi yillarda aksariyat o‘zbek futbolchilarining maqsadi poytaxt klublari bilan shartnoma imzolash bo‘lib qolgani hech kimga sir emas. Buni to‘g‘ri tushunish mumkin, boisi aynan Toshkent klublari orqali terma jamoaga chaqirilish yoki xorijga yo‘l olish mumkin. To‘g‘ri, viloyat jamoalaridan ham futbolchilar termaga chaqirilgan va chaqirilmoqda. Biroq tan olish kerak, oxirgi yillarda aynan “Paxtakor” va “Bunyodkor” futbolchilari (yoki ushbu klublarda o‘ynab ketgan legionerlar) terma jamoaning asosini tashkil qilib keladi. Shu bilan birga ushbu jamoalar o‘rtasidagi bahslar har doim prinsipial ahamiyat kasb etib kelgan. “Toshkent derbisi” deb nom olgan qarama-qarshilik 2010-yillarda o‘z cho‘qqisiga erishgan. O‘sha paytlardagi uchrashuvlar tom ma’noda shiddatli tarzda o‘tar va hozirgidan farqli o‘laroq muxlislar tashrifi ham maqtanishga arziydigan edi. Derbi maqomida o‘tgan o‘yinlar ikki jamoa futbolchilari ochiqchasiga dahanaki janglarga kirishib ketgan holatlarga to‘la bo‘lgan. Ular uchun o‘z klubi sha’ni va uning g‘alabasi birinchi o‘rinda bo‘lgan. Ammo yana shunday futbolchilar ham borki, ular faoliyatida davomida ham “Bunyodkor”, ham “Paxtakor” safida to‘p surishga muvaffaq bo‘lgan. “Daryo” quyida aynan shunday o‘yinchilarga to‘xtatilib o‘tadi.
Ignatiy Nesterov
O‘zbekiston milliy terma jamoasining sobiq darvozaboni Ignatiy Nesterov “Paxtakor”dagi faoliyatini 2002-yilda boshlagan va 2009-yilgacha “sherlar” sharafini himoya qilgan. 2009-yilda esa u “Bunyodkor” safiga qo‘shiladi. Shundan so‘ng posbon poytaxtning boshqa bir klubi “Lokomotiv”da ham to‘p surishga ulgurdi. Hozirda Nesterov faoliyatini “Qizilqum”da davom ettirmoqda.
Anzur Ismoilov
O‘zbekistonning kam sonli bo‘ydor futbolchilaridan biri bo‘lgan Anzur Ismoilov 2003-yilda “Paxtakor” safida debyut qiladi va 2010-yilgacha ushbu klub sharafini himoya qiladi. 2010-yilda esa “Paxtakor”ning ko‘pchilik futbolchilari singari “Bunyodkor”ga o‘tishni ma’qul ko‘radi. Anzur “qaldirg‘ochlar” safida uzoq ushlanib qolmaydi va 2011-yilda Xitoy klubiga yo‘l olib, u yerda 2018-yilgacha harakat qiladi. Shundan so‘ng orada bir-ikki mavsum “Lokomotiv”da to‘p suradi va 2020-yilning avvalida yana “Paxtakor”ga qaytdi.
Server Jeparov
Professional faoliyatini “Navbahor”da boshlagan Server Jeparov 2002-yilda “Paxtakor”ga o‘tib, 2008-yilda “Bunyodkor” safiga qo‘shiladi. 2010-yilgacha “Bunyodkor”da to‘p surgan Jeparov shundan so‘ng legioner sifatidagi faoliyati boshlaydi. Uning rezyumesida “Seul” (Janubiy Koreya), “Ash-Shabob” (Saudiya Arabistoni), “Sonnam” (Janubiy Koreya), “Istiqlol” (Eron) va yana bir qator xorij klublari o‘rin olgan. Server faoliyatini 2019-yilda “Metallurg”da yakunlashga qaror qiladi.
Timur Kapadze
Timur Kapadze faoliyatini “Neftchi”da boshlagan. 2002-yilda esa “Paxtakor”ga o‘tadi va u yerda 2008-yilgacha to‘p suradi. O‘sha yili esa “Bunyodkor” safiga borib qo‘shiladi. 2011-yilgi Osiyo Kubogidan so‘ng Timur ham legionerga aylanadi va Janubiy Koreya, BAA, Qozog‘iston kabi davlatlarda to‘p surib qaytadi. 2018-yilda Toshkentning “Lokomotiv”ida butsalarini mixga ilgan Kapadze darhol murabbiylik faoliyatini boshladi. Hozirda u “Olimpik” klubiga ustozlik qilmoqda.
Anvar Soliyev
Faoliyatini “Navbahor”da boshlab, keyinchalik “Paxtakor” va “Bunyodkor”da o‘ynagan futbolchilardan yana biri Anvar Soliyevdir. 2001-yilda “sherlar” safida debyut qilgan Soliyev ro‘yxatdagi aksariyat futbolchilar singari 2008-yilda “Bunyodkor”ga o‘tadi. 2013-yilda esa yana “Paxtakor”ga qaytadi va 2017-yilda o‘sha yerda faoliyatini yakunlaydi.
Islom Inomov
Kurashlarda o‘zini ayamasligi va fidoiyligi bilan mashhur bo‘lgan Islom Inomov 2004-yildan (tanaffuslar bilan) 2009-yilgacha “Paxtakor”da o‘ynagan. Uning “Bunyodkor”dagi faoliyati esa 2014-yilda boshlanib, 1 yil davom etgan.
Akmal Shorahmedov
O‘zbek muxlislariga ko‘proq Janubiy Koreyaga qarshi o‘yindagi avtogoli bilan tanish bo‘lgan Akmal Shorahmedov “Bunyodkor”dagi 6 yillik faoliyatidan so‘ng (2011 —2017-yillar) bir mavsum “Nasaf”da o‘ynaydi va shundan so‘ng “Paxtakor” safiga qo‘shiladi. Uning “sherlar” tarkibidagi faoliyati ham bir mavsum davom etgan. Shorahmedov hozirda Farg‘onaning “Neftchi” klubi sharafini himoya qilmoqda.
Sardor Rashidov
Tezkorligi va o‘yinni o‘ziga olishdan qo‘rqmasligi orqali bir vaqtlar o‘zbek futbolining kelajagi sifatida qaralgan Sardor Rashidov hozirgacha bir qator klublarda ter to‘kishga ulgurdi. 2009-yilda “Bunyodkor” safida debyut qilgan Sardor 2015-yilgacha “qaldirg‘ochlar” tarkibida javlon uradi. Shundan so‘ng Rashidovning xorijdagi faoliyati boshlanadi. Qatar, BAA va Portugaliya jamoalaridan so‘ng Sardor 2021-yilda yana O‘zbekistonga qaytdi. Faqat bu safar uni “Paxtakor” o‘z safiga qo‘shib oldi. “Sherlar” safida yarim mavsum o‘ynagan Rashidov iyul oyida yana legionerga aylandi. Kuvaytning “Kuvayt SK” klubi Rashidov bilan 1 yillik shartnoma imzoladi.
Doston Hamdamov
“Bunyodkor” akademiyasi tarbiyalanuvchisi hisoblangan Doston Hamdamovdan ham Sardor Rashidovdan kam o‘yin kutilmagan edi. Hatto Hamdamov 2015-yilda Osiyoning eng yaxshi yosh o‘yinchisi ham bo‘lgan. 2018-yilda esa u legionerga aylanadi, ammo Rossiyaning “Anji” klubida ishlari yurishmaydi va “Paxtakor”ga o‘tadi. 2021-yilning boshida Doston yana xorijga yo‘l oldi. BAAning “An-Nasr” klubi futbolchi bilan shartnoma imzolab, uni “Hatta”ga ijaraga berib yubordi. Biroq uning amirliklardagi faoliyati ham qisqa bo‘ldi va 23-iyul kuni yana “Paxtakor”ga qaytdi.
Akrom Komilov
Akrom Komilov ham “Bunyodkor” tarbiyalanuvchisi hisoblanadi, faoliyatini ham aynan “qaldirg‘ochlar” safida boshlagan. 2015-yildan 2019-yilgacha professional maqomda “Bunyodkor”da o‘ynagan Komilov 2019-yilda “Paxtakor”ga o‘tadi. 2021-yilning boshida esa “sherlar” tarkibidagi kuchli raqobat tufayli Olmaliqning “OKMK”siga yo‘l oldi.
Sardor Sobirxo‘jayev
“Bunyodkor” akademiyasida tarbiyalanib, “Paxtakor”da o‘ynayotgan futbolchilardan yana biri Sardor Sobirxo‘jayev 2014-yilda “qaldirg‘ochlar”ning asosiy jamoasiga qabul qilinadi va 2016-yilgacha u yerda to‘p suradi. 2016-yilda esa “Bunyodkor”dan ketib, bir qator jamoalarda faoliyat yuritadi. Ammo 2017-yilda yana “Bunyodkor”ga qaytadi. 2019-yilda esa “Paxtakor” uni safiga qo‘shib oladi.
Ibrohimxalil Yo‘ldoshev
Va nihoyat, ushbu ro‘yxatdagi eng yosh (20 yosh) vakil Ibrohimxalil Yo‘ldoshev poytaxtning har ikkala klubida ham to‘p tepishga muvaffaq bo‘lgan. “Paxtakor” 2020-yilda o‘z tarbiyalanuvchisini muntazam o‘yin amaliyotiga ega bo‘lishi uchun “Bunyodkor”ga mavsum so‘ngiga qadar ijaraga beradi. 2021-yilgi mavsumdan boshlab esa u qadrdon jamoasi sharafini himoya qilmoqda.
Yo‘ldoshev chap qanotdagi ishonchli harakatlari orqali Italiyaning “Jenoa” klubi skautlari e’tiboriga tushdi. Himoyachining transferi borasidagi muzokaralar bilan ProSportManagement va Valerio Juffrida shug‘ullanayotgani aytildi. Qayd etish joiz, aynan ular Shomurodovning “Jenoa”ga o‘tishida ham ishlagan edi.
Bilol Erkin tayyorladi
Izoh (0)