Gollivud yulduzi Jennifer Eniston vaksina olmagan do‘stlari bilan muloqot qilishni to‘xtatdi. U koronavirusning delta shtammini yuqtirib olishdan qo‘rqmoqda

Gollivud yulduzi Jennifer Eniston o‘zining Instagram’dagi sahifasi orqali nima sababdan vaksina olmagan do‘stlari bilan muloqot qilishni to‘xtatganiga izoh berdi, deb yozadi Esquire.

“Agarda sizda ushbu shtamm (delta — tahr.) bo‘lsa, uni baribir menga yuqtira olasiz. Men biroz kasal bo‘lishim mumkin, ammo shifoxonaga tushib qolmayman va vafot etmayman. Lekin vaksina olmagan va salomatligi buzilgan (yoki biror kasallik bilan og‘rigan) boshqa insonga yuqtirishim, shu orqali uning hayotini xavf ostida qo‘yishim mumkin”, — deb yozadi aktrisa.

“Hozirda faqatgina o‘zimizni o‘ylashimiz kerak emas”, — deya yakunlaydi Eniston.

Aktrisaning o‘zi may oyida to‘liq vaksinatsiyadan o‘tgan. “AQShda koronavirusga qarshi vaksinalar borligi sabab juda omadimiz keldi. Afsuski, hamma yerda ham bunday emas… va bilamizki, har birimizning sog‘lig‘imiz boshqalar salomatligiga ta’sir ko‘rsatadi”, — deb yozgan edi o‘shanda aktrisa.

Avvalroq InStyle jurnaliga bergan intervyusida aktrisa vaksinatsiyadan o‘tmagan do‘stlari bilan muloqot qilishni to‘xtatganini ma’lum qilgandi.