Olivye Jiru “Milan”ga o‘tdi. Hujumchi nafaqat o‘ziga qadrdon bo‘lib qolgan Londonni (fransuz faoliyatining deyarli 10 yilini Angliya poytaxtida o‘tkazgan), shuningdek, raqamini ham o‘zgartirdi – Olivye yangi jamoasida 9-raqam ostida harakat qiladi.
Ushbu xabarlardan keyin ko‘plab muxlislar “bekor 9-raqamni olibdi”, “Milan” 9-raqamni muomaladan chiqarishi kerak” kabi izohlar yoza boshladi. Bu “Milan”da 9-raqamga “qarg‘ish teggani” haqidagi gap-so‘zlar fonida aytilgan fikrlar edi. Filippo Inzagidan (2012-yilda faoliyatini yakunlagan) keyin 9-raqamni olganlarning barchasi yo muvaffaqiyatsizlikka uchragan, yo qayd etgan statistikasi o‘zining maqomiga to‘g‘ri kelmagan.
Quyidagi rasmda ham buni ko‘rish mumkin:
Albatta, “Milan”ning so‘nggi o‘n yillikdagi xaridlari ideal transfer siyosatiga ega klubning namunasi emas. Boisi boshqa raqamlar ostida, (boshqa) o‘yinchilar ham kutilgan natija va sarflangan pulni oqlamagan. Ammo Marko van Basten va Jorj Vea kabi o‘yinchilar to‘p surgan qizil-qora forma uchun raqamning sehri hamon muhimdir.
Buni o‘sha paytdagi “Milan”ning sport direktori Leonardoning so‘zlari ham tasdiqlashi mumkin. U 2019-yilda, Kshishtof Pyontek “Jenoa”dan transfer qilingan vaqtda shunday degandi: “U 9-raqamni olishni xohlagan edi, ammo bunga (raqamga) munosib bo‘lish kerak deb o‘ylaymiz, Shuning uchun biz uning o‘rniga 19-raqamni berishga qaror qildik”.
Pyontek o‘zi uchun omadli bo‘lgan mavsumni o‘tkazib, “Milan”ning mavsumdagi 9 ta goliga mualliflik qildi (transfergacha “Jenoa”da 13 ta gol urgandi) va munosib bo‘lib 9-raqamni oldi. Ammo olti oydan so‘ng “Herta”ga jo‘nab ketdi.
- Raqamini 9 ga o‘zgartirish bilan bog‘liq voqea Aleshandre Patoga ham foyda keltirmagan (Inzagi nafaqaga chiqqanidan keyin uning raqamini oladi) – braziliyalik jarohat olib, deyarli maydonga tushmaydi va ko‘p o‘tmay “Korintians”ga jo‘naydi;
- Matri, Torres, Destro, Iguain va Manjukich ham “Milan”da atigi olti oy davomida to‘p suradi.
- 2008/09-yilgi mavsum – 9-raqamli futbolchi “Milan” tarkibida kamida 10 ta gol urgan so‘nggi mavsum bo‘lib qoldi (Inzagi – 13 ta gol);
- “Milan”da Inzagi ketganidan keyin ham A Seriyada 10+ gol urgan futbolchilar yetarli: Stefan ash-Shaaravi, Jampaolo Patssini, Mario Balotelli, Jeremi Menez, Karlos Bakka, Patrik Kutrone, Zlatan Ibrahimovich va Frank Kessie. Ammo ularning hech biri 9-raqamda o‘ynamagan.
Shu bilan birga 2009/10-yilgi mavsumdan 2016/17-yilgacha Jiru Fransiya va Angliya chempionatlarida kamida 11 tadan gol urib kelgan.
Fransiyalik futbolchi kuzda 35 yoshga to‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)