Farg‘ona viloyatining eng mashhur turistik maskani — Shohimardonda sayyohlik mavsumi boshlandi. Bu haqda Qirg‘izistonning Botken viloyati Qadamjoy tumanida o‘tkazilgan tadbirda ma’lum qilindi, deya xabar bermoqda “Daryo” muxbiri Azizjon Ermatov.
Qayd etilishicha, Shohimardon qishlog‘i va Qadamjoy tumanida sayyohlik mavsumi ochilishiga bag‘ishlangan tantanali tadbirlar o‘tkazilgan. Unda Farg‘ona va Botken viloyati delegatsiyalari, taniqli madaniyat va san’at vakillari, jurnalistlar ishtirok etgan.
Tadbirda qatnashgan Farg‘ona hokimi Xayrulla Bozorov, Botken gubernatori Abdukarim Alimboyev o‘zbek va qirg‘iz xalqlarining turizm sohasidagi hamkorligi yangi bosqichga ko‘tarilganini ta’kidlagan.
Shundan so‘ng Shohimardon markazidan 5 kilometr uzoqlikda, dengiz sathidan 3000 metr balandlikda joylashgan Ko‘li Qubbonga eltuvchi uzoq vaqt davomida yopiq bo‘lgan osma dor yo‘li qaytadan ochilgan.
Farg‘ona viloyati hokimi Xayrulla Bozorov va Botken viloyati gubernatori Abdukarim Alimboyev osma dor yo‘lidan o‘tib, Ko‘li Qubbon bo‘ylab qayiqda sayr qilgan.
Farg‘ona viloyati hokimi Xayrulla Bozorov va Botken viloyati gubernatori Abdukarim Alimboyev Shohimardon qishlog‘i markazida joylashgan istirohat bog‘ida mahalliy aholi vakillari bilan uchrashgan.
Uchrashuvda Xayrulla Bozorov Shohimardonga mikroavtobuslar qatnovi yo‘lga qo‘yilishini va qishloq markazidagi istirohat bog‘i ta’mirlanishini ma’lum qilgan.
“Bizda mana shunday ajoyib joylar bor. Bunaqangi chiroyli tabiatni, ko‘ngli pok, qalbi toza, samimiy va kamtarin insonlarni Xudo bergan. Odamlarimizning tinch, xotirjam hayot kechirishlarini ta’minlash, o‘zaro qo‘shni davlatlar bilan bahamjihat, qadrdon bo‘lib yashash, do‘stlik, birodarlik aloqalarini bundan-da mustahkamlash maqsadida ikki davlat delegatsiyalari uchrashib turibmiz. Shohimardonga yoshligimizda tez-tez oila-a’zolarimiz, sinfdoshlar, do‘stlar bilan kelib, ziyorat qilar edik. Mana bugun ham bu yerga kelish nasib qildi. O‘sha paytlar bu yerlar gavjum, gullab-yashnagan, odamlar ko‘p bo‘lar edi. Mana yana Prezidentlarimizning yuksak siyosiy irodalari bilan chegaralarni ochish, ham iqtisodiy, ham ijtimoiy, madaniy sohalarni rivojlantirish borasida harakat qilyapmiz.
Bugun Shohimardonda ham, Qadamjoyda ham, Qurbon ko‘lda ham turistik mavsumning rasmiy ochilishi. Hammaga e’lon qilamiz. Butun O‘zbekiston ko‘chib keladi Shohimardonga. To‘ylar, tantanalar bo‘ladi. Mana, osma dor yo‘lini ham ochdik, endi Shohimardonga kelgan turistlar Qurbon ko‘lini aylanishi, ziyorat qilishi, dam olishi mumkin. Shohimardon markazidagi istirohat bog‘ini ta’mirlash uchun ham pul beramiz. Tungi chiroqlar o‘rnatiladi, ko‘chalar asfalt qilinadi. Markaz obodonlashtirilib, mehmonlarning kelishiga tayyorgarlikni boshlashimiz kerak. Eng asosiysi, yo‘lovchilar uchun mikroavtobuslar qo‘yiladi”, — dedi viloyat hokimi Xayrulla Bozorov.
Shohimardonda sayyohlik mavsumining ochilishi munosabati bilan tashkillangan tantanali tadbirlar Botken viloyatida davom ettirilgan.
Qadamjoy tumanidagi “Metallurg” stadionida o‘zbek va qirg‘iz xalqlarining taniqli san’atkorlari ishtirokida konsert dasturi o‘tkazilgan.
Izoh (0)