“Paxtakor” futbol klubi futbolchi va xodimlarning yillik daromadlarini e’lon qildi.
Shveysariyalik hujumchi Eren Derdiyok jamoaning eng ko‘p maosh oladigan futbolchisi ekani ma’lum bo‘ldi. “Paxtakor” taqdim etgan ma’lumotga ko‘ra, uning maoshi yiliga 1,3 million yevroni tashkil qiladi. Bu 16 milliard 439 million so‘mni tashkil qiladi.
Futbolchi 2020-yilning yanvarida “Paxtakor” safiga kelib qo‘shilgan. Uning kelganiga roppa-rosa 1,5 yil bo‘lganini inobatga olsak, Eren “Paxtakor”da shu vaqtga qadar 24,66 milliard so‘m daromad olgan.
Futbolchi “sherlar” safida shu vaqtga qadar barcha musobaqalar doirasidagi 46 ta o‘yinda 18 ta gol urdi va beshta golli uzatma amalga oshirdi.
Derdiyokning har bir o‘yini “Paxtakor” 536 million so‘mga tushmoqda. Eren “Paxtakor”da urgan har bir goli uchun 1,37 milliard so‘m, har bitta assist uchun esa 4,9 mlrd so‘m olmoqda.
Yana boshqacha aytadigan bo‘lsak, Derdiyok “Paxtakor”da kuniga 45 million so‘m, soatiga 1,9 million so‘m daqiqasiga 31 ming so‘m ishlab topmoqda.
Derdiyokning “Paxtakor” bilan amaldagi shartnomasi 2021-yil dekabriga qadar mo‘ljallangan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)