Prezident Administratsiyasining transport bo‘limi bir nechta Mercedes-Benz avtomobillarini kimoshdi savdosiga qo‘ydi. Bu haqda Davlat aktivlarini boshqarish agentligi elektron-onlayn auksionlarni tashkil etish markaziga tayanib, “Gazeta.uz” xabar berdi.
Bular uchta Mercedes-Benz E240, bitta Mercedes-Benz E320 avtomobillari bo‘lib, barchasi texnik jihatdan xizmatga yaroqli. Avtomobillar qora rangda, 2003—2004-yillarda ishlab chiqarilgan. Yurgan masofasi 378,3 ming kilometrdan 854,2 ming kilometrgacha.
Sotuvga qo‘yilgan ushbu avtomobillarning barchasi PPP avtoraqamlariga ega. Boshlang‘ich narxlar — 129,6 million so‘mdan 136 million so‘mgacha.
Shuningdek, kimoshdi savdosiga 1996-yilda ishlab chiqarilgan, yurgan masofasi 352 ming kilomterdan ortiq, oq rangli Mercedes-Benz 412 D KA ham qo‘yilgan. Uning boshlang‘ich narxi 188,1 million so‘mni tashkil etmoqda.
Barcha lotlar bo‘yicha arizalar 15-iyungacha qabul qilinadi, kimoshdi savdosi 17-iyun kuni bo‘lib o‘tadi.
Izoh (0)