Saudiya Arabistonida 30-maydan boshlab qirollik hududiga kirishga qo‘yilgan taqiq 11 ta xorij mamlakati fuqarolari uchun olib tashlandi. Bu haqda “TASS” xabar qilgan.
“30-may soat 01:00 dan boshlab Buyuk Britaniya, Germaniya, Irlandiya, Italiya, BAA, Portugaliya, AQSh, Fransiya, Shvetsiya, Shveysariya va Yaponiya fuqarolarining qirollik hududiga kirishiga ruxsat beriladi. Ularga nisbatan sanitar karantin tartibi qo‘llaniladi”, – deya xabar bergan Saudiya Arabistoni matbuot agentligi. Qaror mazkur mamlakatlardagi epidemiologik vaziyat barqarorlashgani va koronavirusga qarshi kurashning samarali ekanligi va pandemiya nazoratga olingani bilan izohlangan.
Koronavirus tarqalishining oldini olish maqsadida 3-fevraldan boshlab qirollikda 20 ta mamlakat fuqarolarining Saudiya Arabistoni hududiga kirishi vaqtincha to‘xtatilgan edi. Saudiya Arabistoni Ichki ishlar vazirligi mamlakatga kirishi vaqtinchalik taqiqlangan xorijliklar safiga Argentina, Braziliya, Buyuk Britaniya, Germaniya, Misr, Hindiston, Indoneziya, Irlandiya, Italiya, Livan, BAA, Pokiston, Portugaliya, AQSh, Turkiya, Fransiya, Shvetsiya, Shveysariya, JAR, Yaponiya fuqarolari kirishini e’lon qilgandi. Qirollikka kelish bo‘yicha hujjat topshirishidan avval ikki hafta ichida mazkur mamlakatlarda bo‘lgan boshqa xorij davlatlari fuqarolarining ham Saudiyaga kirishiga taqiq qo‘yilgan edi.
2020-yil dekabr oyi oxiridan 17-mayga qadar Saudiya Arabistonida mamlakat hududiga xorijliklarni kiritish kuchli nazorat ostiga olingan. Mamlakat fuqarolariga hududdan quruqlik, dengiz va havo yo‘llari orqali uzoqroqqa chiqish taqiqlangan. 17-maydan keyin xorijga safar qilish bo‘yicha taqiq koronavirusga qarshi vaksinatsiya qilinganlar uchun bekor bo‘ldi. Shuningdek, avvalroq, ya’ni oxirgi olti oy ichida COVID-19 bilan og‘rigan, 18 yoshdan kichik va maxsus sug‘urta hujjatini rasmiylashtirganlarning ham havo yo‘li orqali xorijga safar qilishiga ruxsat berilgan. Aeroport hududiga va samolyot bortiga kirishi uchun yo‘lovchi o‘z telefoniga maxsus ilovani yuklab, o‘rnatib olishi talab qilinadi, unda vaksinatsiya yoki kasallanish yuzasidan barcha zarur axborotlar jamlangan bo‘ladi.
Avvalroq Saudiya Arabistonining “maxsus shartlar” asosida Haj safarlarini amalga oshirishga ruxsat berishi xabar qilingandi.
Izoh (0)