Iftorlik dasturxoni uchun go‘shtli rasstegay tayyorlaymiz 

Xamiri yumshoq go‘shtli rasstegay rus millatining an’anaviy yeguligi hisoblanadi. Ammo u dunyoning turli burchaklarida bekajonlar tomonidan maromiga yetkazib pishiriladi. Shuningdek, iftorlik uchun yoziladigan dasturxonning ham ko‘rki bo‘lishi, shubhasiz.

Kerakli mahsulotlar:

• sut — 100 ml;
• suv — 100 ml;
• xamirturush — 25 gramm;
• shakar — 2 osh qoshiq;
• un — 550 gramm;
• tuz — 1 choy qoshiq;
• sariyog‘ — 75 gramm;
• tuxum — 2 ta;
• o‘simlik yog‘i — 3 osh qoshiq;

• piyoz — 2 ta;
• o‘simlik yog‘i — 1 osh qoshiq;
• qiyma — 500 gramm;
• tuxum — 1 dona;
• tuz va ziravorlar.

1. Sut, suv, xamirturush, shakar va 2 osh qoshiq un yaxshilab aralashtiriladi. Sochiq bilan yopilib, iliq joyga 15—20 daqiqaga qo‘yiladi.
2. Qolgan un elakdan o‘tkaziladi va tuz bilan aralashtiriladi. Sariyog‘ eritilib, bir xil holga kelguncha tuxum bilan ko‘pirtiriladi.
3. Opara, un, tuxumli aralashma va o‘simlik yog‘i aralashtiriladi. Yumshoq xamir qoriladi.
4. Xamir katta shar shakliga keltirilib, iliq joyga 1 soatga qo‘yiladi.
5. Piyoz tozalanadi, mayda to‘g‘ralib, yumshagunga qadar 2—3 daqiqa o‘simlik yo‘gida qovuriladi.
6. Piyoz ustidan qiyma, tuz va ziravorlar ta’bga ko‘ra solinadi. 7—8 daqiqa davomida qovurilib, so‘ngra sovutishga qo‘yiladi.
7. Bu vaqtda pech 180 darajada qizdiriladi.
8. Xamir 10—12 qismga bo‘linadi. Ular 12—15 santimetr kattalikda yoyiladi.
9. Xamir o‘rtasiga nachinkalar qo‘yilib, ikki tomondan xamir cheti birlashtiriladi va xamir markazi biroz ochiq qoldiriladi.
10. Tuxum sarig‘i biroz tuz bilan aralashtiriladi va pishirish varag‘iga terilgan rasstegaylar yuzasiga surib chiqiladi. Ta’bga ko‘ra kunjut ham sepish mumkin.
11. Go‘shtli rasstegaylar qizdirilgan pechga 20—25 daqiqaga qo‘yiladi. Yuzasi qizargach dasturxonga tortiladi.