Prezident matbuot kotibi Sherzod Asadov 3-may, dushanba kuni o‘tkazilgan brifingda Suriya, Iroq va Afg‘onistondagi qurolli to‘qnashuvlar hududlaridan qaytarilayotgan o‘zbekistonliklar haqida so‘z yuritdi, deya xabar bermoqda “Daryo” muxbiri.

Foto: “Daryo” / Madina Nurman

“30-aprel, juma kuni mamlakatimizdagi insonparvarlik siyosatining, muborak Ramazon kunlaridagi yana bir xayrli ishning guvohi bo‘ldik. Bu “Mehr-5” operatsiyasi. Ushbu operatsiya natijasida yurtimizga Yaqin Sharqdan 93 nafar ayol va ularning bolalari olib kelindi.

Fursatdan foydalanib eslash o‘rinliki, shu paytgacha 5 ta operatsiya natijasida 435 nafar vatandoshimiz Yaqin Sharq va Afg‘onistondagi qurolli to‘qnashuvlar hududlaridan qaytarildi.

Kimdir biladi, kimdir bilmasligi mumkin, lekin bu juda mashaqqatli, qaltis jarayon. Buning zamirida Prezidentimizning qat’iyati, diplomatik vakolatxonalar, xavfsizlik tuzilmalari, tibbiyot xodimlarining fidoyiligi va yuksak professionalligi yotibdi. Qaytarilgan yurtdoshlarimizni reabilitatsiya qilish, tibbiy-psixologik yordam ko‘rsatish, moddiy ko‘maklashish bo‘yicha ham katta ishlar qilinmoqda”, — dedi Asadov.

Ma’lumot uchun, “Mehr” insonparvarlik operatsiyasi ilk bor 2019-yili amalga oshirilgan bo‘lib, unda 156 nafar o‘zbekistonlik, asosan, ayollar va bolalar Suriya poytaxti Damashqdan maxsus reys bilan O‘zbekistonga olib kelingan. 2019-yilning oktabr oyida esa Yaqin Sharqdagi mojarolar hududidan o‘zbekistonliklarni qaytarish bo‘yicha ikkinchi maxsus operatsiya amalga oshirilgan. 2020-yilning dekabridagi uchinchi maxsus operatsiya doirasida Suriyadan 25 nafar ayol va 73 nafar bola, 2021-yildagi “Mehr-4” operatsiyada esa 24 nafar fuqaro Afg‘onistondan O‘zbekistonga qaytarilgan.