Prezident Shavkat Mirziyoyev 23-aprel, juma kuni Toshkent shahrining Yashnobod tumaniga tashrifi davomida hududdagi “Parvoz” MFYda ham bo‘lib, mahalla faollari va nuroniylar bilan muloqotda poytaxtdagi har bir mahallaga obodonlashtirish uchun mablag‘ ajratilishini ta’kidlagan. Bu haqda 26-aprel, dushanba kuni Milliy matbuot markazida o‘tkazilgan brifingda Prezident matbuot kotibi Sherzod Asadov ma’lum qildi, deya xabar bermoqda “Daryo” muxbiri.
“Davlat rahbari Yashnobod tumanida avval ahvoli og‘ir bo‘lgan ‘Parvoz’ mahallasiga ham bordi. Bugun vaziyat butunlay o‘zgargan. ‘Obod mahalla’ siyosatini amalga oshirish natijasida bu mahallaning qiyofasi tubdan o‘zgarib, aholining osuda yashashi va dam olishi uchun barcha sharoitlar yaratilgan. Hamma joy toza, tartibli.
Prezident mahalla bo‘ylab yurib, obodonlashtirish ishlari bilan tanishdi va nuroniylar, ayollar, bolalar bilan suhbatlashdi”, — dedi Asadov.
Uning ta’kidlashicha, davlat rahbari mutasaddilarga ushbu “Parvoz” mahallasini namuna qilib olib, Toshkent shahridagi barcha 524 ta mahallani shunday obod qilish bo‘yicha topshiriq bergan.
“Buning uchun har bir mahallaga, hozirgi holatidan kelib chiqib, o‘rtacha 2 milliard so‘mdan mablag‘ ajratish bo‘yicha topshiriq berdi”, — dedi Prezident matbuot kotibi.
Izoh (0)