Prezident matbuot kotibi Sherzod Asadov 26-aprel, dushanba kuni o‘tkazilgan brifingda ota-onalar, maktab va oliygohlar rahbarlariga yoshlarni Toshkentdagi Texnopark’da joylashgan korxonalarga ekskursiyalarga olib borishni maslahat berdi. Bu haqda “Daryo” muxbiri xabar qilmoqda.
“Prezidentimiz 23-aprel, juma kuni Toshkent shahridagi Texnopark’da ham bo‘ldi. Bu joyni mamlakatimizda iqtisodiyotni sanoatlashtirishga qaratilgan ishlarning, industrial transformatsiyaning yaqqol namunasi deyish mumkin.
Bilasizlar, bu yerda sobiq Toshkent aviatsiya zavodi bo‘lardi. Oxirgi paytlar uning bloklari qariyb tashlandiq holga kelib qolgandi. Hozir ko‘rsangiz, havasingiz keladi: rivojlangan davlatlardagidek zamonaviy, innovatsion industrial zonaga aylangan”, — dedi Asadov.
Uning qayd etishicha, Texnopark’da yil yakunigacha yana 7 ta loyiha ishga tushishi orqali qo‘shimcha 2,5 mingga yaqin ish o‘rni yaratiladi.
“O‘tgan hafta ishga tushirilgan, Prezidentimiz borgan to‘rtta korxonaning o‘zida ming kishi, asosan, yoshlar ishli bo‘lgan. Hali oldinda yana ko‘plab loyihalar bor. Umuman olganda, bugungi kunga qadar Texnopark’da ishga tushirilgan 10 ta loyihada jami 4,5 ming kishi ish bilan ta’minlangan bo‘lsa, yilning oxirigacha ishga tushadigan yana 7 ta loyiha doirasida qo‘shimcha 2,5 mingga yaqin ish o‘rni yaratiladi. 2026-yilga kelib Texnopark’da ishlayotganlar soni 10 mingdan oshishi kutilmoqda.
Fursatdan foydalanib, bir narsani aytmoqchiman. Bizni ko‘rib turgan ota-onalar, maktab va oliygohlar rahbarlari yoshlarimizni shu korxonalarga ekskursiyalarga olib borib, yangi O‘zbekistondagi tarixiy o‘zgarishlarni ko‘rsatishsa, zamonaviy texnologik sohalarga qiziqtirishsa, juda yaxshi bo‘lardi”, — dedi Prezident matbuot kotibi.
Izoh (0)