“Chelsi” xo‘jayini Roman Abramovich Kremldan kelgan buyruqdan keyin Yevropa Superligasini tark etish qaroriga kelgan, deya xabar qilmoqda Germaniyaning Süddeutsche Zeitung gazetasi.
Manbada ta’kidlanishicha, Abramovichga Superliga Rossiyaning qiziqishlariga qarama-qarshi ekani tushuntirilgan. Sababi “Gazprom” kompaniyasi Chempionlar Ligasining asosiy homiylaridan biri hisoblanadi.
“Rossiyaning “Bavariya”si hisoblangan “Zenit” deyarli “Gazprom”ga qarashli va klub Chempionlar Ligasi saqlab qolinishini istagan”, — deyiladi nashrda.
Ta’kidlanishicha, Abramovich Rossiya prezidenti Vladimir Putin bilan munosabatlari buzishini xohlamagan va bu loyihani tark etgan.
“Chelsi” Angliyaning boshqa klublari qatorida Yevropa Superligasini tark etishini e’lon qildi.
APLning olti klubi va yana oltita jamoa 18-aprel kuni Yevropa Superligasiga asos solinganini e’lon qildi. Biroq ingliz klublari ketma-ket yangi loyihani tark etganini e’lon qildi va Yevropa Superligasi ikki kunga bormay to‘xtatildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)