Toshkent shahar IIBB Jinoyat qidiruv boshqarmasi korrupsiya va iqtisodiy jinoyatlarga qarshi kurash bo‘limi xodimlari 30 gramm radioaktiv material sotmoqchi bo‘lgan fuqarolarni qo‘lga oldi, deb xabar bermoqda boshqarma matbuot xizmati.
Rejalashtirilayotgan noqonuniy kelishuv haqida ma’lumot Toshkent shahar IIBB tezkor vakillariga 17-aprelda kelib tushgan. Shu kunning o‘zida jinoyat qidiruv xodimlari Alohida vazifalarni bajaruvchi mobil otryadni jalb qilgan holda jinoyatchilarni qo‘lga olish bo‘yicha tadbir o‘tkazgan. Natijada uch kishi 30 gramm radioaktiv material evaziga 9 ming dollar olayotganida qo‘lga olingan.
Qo‘lga olinganlardan biri — muqaddam sudlangan Andijon viloyatilik 33 yoshli O.A., uning sheriklari — 30 yoshli A.N. va 27 yoshli A.T. ilgari jinoyat sodir etgani ma’lum bo‘lmasa-da, aynan ular xaridor izlab yurgan.
Mazkur fakt asosida Toshkent shahar IIBB Tergov boshqarmasi tomonidan Jinoyat kodeksining 252-moddasi 2-qismi (radioaktiv materiallarni qonunga xilof ravishda egallash) bo‘yicha jinoiy ish qo‘zg‘atilgan.
“Tergov fuqarolar mazkur materiallarni qayerdan olganliklarini aniqlashda davom etmoqda”, — deyiladi xabarda.
Izoh (0)