Namangan viloyati Pop tumanida yuk mashinasi piyodani urib ketib, voqea joyidan yashiringan, deya xabar bermoqda viloyat IIB matbuot xizmati.
Qayd etilishicha, 2021-yil 18-aprel kuni soat 03:30 larda Pop tumani Toshkent–O‘sh yo‘lining 284-kilometrida “Qo‘shminor” MFY hududida noma’lum haydovchi avtomashinasini Toshkent–Vodiy yo‘nalishi bo‘ylab boshqarib borayotib harakat xavfsizligini ta’minlay olmay, piyodani urib yuborgan.
Oqibatda piyoda tan jarohati olib, voqea joyida vafot etgan.
Ushbu holat bo‘yicha viloyat hududida “To‘sib ushlash” maxsus rejasi harakatga keltirilib, viloyat IIB JQB, YHXB va tuman IIB xodimlari tomonidan tezkor qidiruv va surishtiruv harakatlari olib borilgan.
Natijada ushbu jinoyatni Andijon shahrida yashovchi, 1986-yilda tug‘ilgan fuqaro MAN rusumli yuk avtomashinasida piyodani urib yuborib, uni hayotini xavf ostida qoldirib, hodisa joyidan ketib qolgani aniqlangan.
Avtomashina jarima maydoniga qo‘yilib, tegishli ko‘rgazmalar olingan.
Ushbu holat bo‘yicha tuman IIB huzuridagi Tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport qoidalarini buzish) va 117-moddasi 2-qismi (hayoti yoki sog‘lig‘i xavf ostida qolgan shaxsga yordam ko‘rsatmaslik) bilan jinoyat ishi qo‘zg‘atilgan.
Bundan avval Namanganda mashinasi bilan pastlikka tushib ketgan Damas haydovchisi vafot etgani, Sirdaryoda Nexia va ikki yuk mashinasi ishtirokidagi YTH natijasida 2 kishi vafot etgani hamda Samarqandda piyoda Matiz urib ketishi oqibatida vafot etgani haqida xabar berilgandi.
Izoh (0)