“Viloyatda birdamlik yo‘q” – Shavkat Mirziyoyev Toshkent viloyati ikkiga bo‘linishi mumkinligini ma’lum qildi

Ayni paytda Prezident Shavkat Mirziyoyev raisligida o‘tkazilayotgan Xalq deputatlari Toshkent viloyati kengashining navbatdan tashqari 28-sessiyasida davlat rahbari Toshkent viloyati ikkiga bo‘linishi mumkinligini ta’kidladi, deya xabar bermoqda “Daryo” muxbiri.

“Men hozir sizlarga bir sirni aytaman: bugun o‘zim bilan xarita olib kelganman. Unga ko‘ra, Toshkent viloyatini ikkiga bo‘lishni rejalashtirib turibman. Mana, hammalaringiz jim bo‘lib qoldingiz. Bunday gap yoqmaydi sizlarga. Ammo Konstitutsiya bo‘yicha shunday huquq menga berilgan: taklif berishim mumkin.

Birinchidan, viloyatning joylashuvi noqulay: Angrendan Bekobodga yetguncha ancha vaqt ketadi. Ikkinchidan, xafa bo‘lmanglar, viloyatda birdamlik yo‘q. Boshqa viloyatlarda ko‘p tumanlarning gapi bir joydan chiqadi. Bugungi zamonda 22 ta hududni birdaniga boshqarishni vallamat hokim ham eplay olmaydi, albatta.

Hozircha bu rejani amalga oshirmay turaman. Hozir Hidoyatov nomzodi hokim etib tasdiqlandi, yana bir marta imkon berib ko‘rmoqchiman.

Agar xohlasak va harakat qilsak, Toshkent viloyatida 150 mingta ish o‘rni yaratsa bo‘ladi. Bu viloyat boshqa viloyatlardagi ishsizlarni ham ish bilan ta’minlashi mumkin. Hamma sharoit bor. Bugundan boshlab hammamiz birlashib, viloyatni rivojlantiramiz yoki vaqt o‘tib, boshqacha qaror qabul qilamiz. Ochig‘ini aytaman, viloyatni ikkiga bo‘lsak, qanday nom berishni ham o‘ylab qo‘yganman.

Oxirgi marta imkon beraman. Ishga noloyiqligini tan olishni istamaydigan, ammo baribir ariza yozmaydigan, lavozimni yaxshi ko‘radiganlar ishga kirishmasa, oxirgi chorani ko‘ramiz”, — dedi davlat rahbari.