Buyuk Britaniya bosh vaziri Boris Jonson qirollikda koronavirus pandemiyasi sabab e’lon qilingan cheklov choralari vaziyatga qarab, 21-iyunda bekor bo‘lishi mumkinligini ma’lum qildi. Bu haqda “RIA Novosti” xabar bergan.
“21-iyunda barcha qonuniy cheklovlarni va ijtimoiy masofalanishni bekor qila olamiz deb o‘ylayman”, — degan Jonson.
Bosh vazir cheklovlarni bekor qilish yuzasidan tegishli qoidalarga bo‘ysunilsa, ommaviy sport tadbirlarini o‘tkazishga yozdan ruxsat berilishi mumkinligini ham aytib o‘tgan.
Dastlabki bosqichda 8-martdan maktablar ochiladi va bir nafar begona shaxs bilan ochiq havoda uchrashishga ruxsat beriladi.
29-martdan boshlab o‘quvchilar yana ta’tilga chiqqach, “oltilik”, ya’ni ko‘chada olti nafar odam yoki ikkita oila o‘zaro muloqot qilishi mumkin bo‘ladi. Tennis kortlari, golf-klublar faoliyatini boshlaydi, shuningdek, ochiq havoda shug‘ullanish mumkin bo‘lgan boshqa sport turlariga qo‘yilgan cheklovlar ham bekor qilinadi.
12-apreldan nooziq-ovqat do‘konlari, Angliyadagi restoranlarning terrasalari, go‘zallik salonlari, sartaroshxonalar, muzeylar, kutubxonalar va hayvonot bog‘larining faoliyat yuritishiga ruxsat tegadi.
Taxminlarga ko‘ra, 17-maydan qovoqxonalar, restoranlar, kinoteatrlar, mehmonxonalar ochiladi, oilalarning binolar ichida uchrashib, suhbat qurishiga qo‘yilgan taqiqlar bekor bo‘ladi.
Cheklovlarni bekor qilish bo‘yicha har bir bosqichda to‘rtta asosiy shartga bo‘ysunish talab etiladi: vaksinatsiya dasturini muvaffaqiyatli davom ettirish, emlashlarning infeksiyaga chalinib, kasalxonalarga tushadiganlar va vafot etishi mumkin bo‘lgan bemorlar sonining qisqarishiga xizmat qilishini ta’minlash, COVID-19’ning yangi shtammlari bilan aholining kasallanish ehtimolini kamaytirish zarur.
Cheklovlarni yumshatishdagi har bir bosqich o‘rtasidagi muddat to‘rt haftadan kam bo‘lmasligi lozim. Har bir bosqichda, avvalo, vaziyatga baho beriladi, sababi Jonson aytib o‘tgan muddatlar cheklovlar yumshatilishi mumkin bo‘lgan minimum darajadagi sanalardir, ularning vaqti holatga qarab yana kechikib ketishi mumkin.Avval Buyuk Britaniya kompaniyalarining xodimlari ommaviy ravishda ishdan bo‘shatilishi mumkinligi, Boris Jonson vaksina ishlab chiqarish vaqtini uch baravar qisqartirishni taklif qilgani xususida xabar berilgandi.
Izoh (0)