Ko‘pchilik uyquni qochirish va energiyaga to‘la bo‘lish uchun tongni qahva bilan qarshi oladi. Ushbu ichimlikning “baxt eleksiri” ekani va kayfiyatni ko‘tarishi rost, ammo kofein miqdori me’yordan oshib ketsa salomatlik bilan bog‘liq muammolar yuzaga keladi. Shu sabab ham uning o‘rniga tetiklashtiruvchi, shu bilan birga tabiiy mahsulotlarni iste’mol qilish tavsiya qilinadi.
Kinoa
Foydali moddalar, o‘simlik oqsili, temir, kalsiy, magniy va murakkab uglevodlarning koni bo‘lgan mazkur yorma organizmni energiya bilan ta’minlaydi. Qolaversa, qondagi qand miqdorining keskin ko‘tarilishiga sababchi bo‘lmaydi.
Asal
Nonushtaga shirinlik yoki qandolat mahsulotlari iste’mol qilmang, buning o‘rniga tabiiy asalga e’tibor qarating. Glikemik ko‘rsatkichi yuqori bo‘lmagan ushbu mahsulot qondagi qand miqdoriga ta’sir qilmagan holda shirinlikka bo‘lgan moyillikni qondiradi.
Ismaloq
Ko‘katlar, xususan, ismaloq organizmdagi hujayralar va a’zolarni kislorod bilan ta’minlash xususiyatiga ega bo‘lgan temir moddasiga boy hisoblanadi. Qolaversa, energiyaga ega bo‘lishda ahamiyatli bo‘lgan kletchatka, magniy va foli kislotasining ham manbasi.
Bodom
Kunning o‘rtasiga kelib mudroq bosishidan shikoyat qiladiganlar uchun nonushtaga bodom yeyish tavsiya qilinadi. Monoto‘yingan yog‘ va B guruhi vitaminlariga boy bo‘lgan ushbu mahsulot tez tetiklashtirish xususiyatiga ega. Tamaddi vaqtida bodom yeyilsa, kechgacha qahvasiz ham energiyaga to‘la yurish mumkin bo‘ladi.
Losos
Qizil baliqda hazm jarayonida tetiklashishga hissa qo‘shadigan moddalar — oqsil, riboflavin, niatsin, piridoksin va omega-3 yog‘ kislotalari bisyor bo‘ladi.
Lavlagi
Lavlagi ham ismaloq va boshqa sabzavotlar singari temirning koni hisoblanadi. Uni muntazam iste’mol qilish gemoglobinni ko‘taradi, hujayralarning kislorod bilan ta’minlanishini yaxshilaydi. Tarkibidagi C vitamini esa organizmni sovuq haroratda viruslardan himoya qiladi.
Apelsin
Mazkur sitrus meva organizmda energiya ishlab chiqarilishida muhim rol o‘ynaydigan riboflavinning koni. Apelsinda, shuningdek, C vitamin, foli kislotasi va kaliy ham mo‘l bo‘ladi.
Banan
Bananda uyg‘ongandan keyin organizmni energiya bilan to‘ldiradigan barcha zarur moddalar uglevodlar, kletchatka, kaliy va B6 vitamini mavjud. Shu sabab ham nonushtaga banan qo‘shib tayyorlangan kokteyl iste’mol qilish yoki bananni o‘zini butunligicha yeyish tavsiya qilinadi.
Yormalar
Butun yormalardan tayyorlangan bo‘tqalar kletchatka va murakkab uglevodlarga boy ekani sababli kun davomida energiyaga boy bo‘lishingizni ta’minlaydi. Shu sabab ham suli yormasi, jigarrang guruchni taomnomaga kiritish tavsiya qilinadi.
Tuxum
Tuxum tarkibida barcha aminokislotalar mavjud ekani sabab ham uning iste’molidan keyin inson o‘zini energiyaga to‘la his qiladi. Qolaversa, tuxumda sog‘lom ovqatlanish uchun ahamiyatli bo‘lgan katta miqdorda oqsil va B guruhi vitaminlari ham bisyor.
Izoh (0)