Buxoroda farzandlari uchun aliment puli to‘lamagan ota jazolandi, deya xabar bermoqda viloyat IIB axborot xizmati
Qayd etilishicha, Majburiy ijro byurosi Romitan tumani bo‘limi ish yurituvida fuqarolik ishlari bo‘yicha Romitan tumanlararo sudining 2017-yil 28-sentabrdagi qarzdor S.A.dan undiruvchi D.M. foydasiga voyaga yetmagan farzandlarining ta’minoti uchun har oyda ish haqi va boshqa daromadlarining 1/3 qismi miqdorida aliment undirish to‘g‘risida ijro hujjati mavjud.
Qarzdor S.A. voyaga yetmagan farzandlarini moddiy ta’minlashdan bo‘yin tovlab, aliment mablag‘larini ikki oydan ortiq muddat mobaynida to‘lamaganligi sababli Romitan tuman ma’muriy sudining 2020-yil 19-fevraldagi qaroriga asosan Ma’muriy javobgarlik to‘g‘risidagi kodeksning 47-4-moddasi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bilan unga nisbatan 5 sutka ma’muriy qamoq jazosi tayinlangan.
Qarzdor S.A. ma’muriy qamoq jazosi qo‘llanilganidan keyin ham o‘ziga tegishli xulosa chiqarmasdan, 6 oydan ortiq muddatda 22 million so‘m aliment pullarini to‘lashdan qasddan bo‘yin tovlab kelgan.
Mazkur holat yuzasidan unga nisbatan Romitan tumani ichki ishlar bo‘limi tomonidan Jinoyat kodeksining 122-moddasi 1-qismi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bilan jinoyat ishi qo‘zg‘atilib, dastlabki tergov harakatlari olib borilgan va ayblov xulosasi bilan jinoyat ishi sudga yuborildi.
Jinoyat ishlari bo‘yicha Romitan tuman sudining 2020-yil 25-noyabrdagi hukmi bilan S.A. Jinoyat kodeksining 122-moddasi 1-qismi bilan aybli deb topilib, unga nisbatan 3 oy muddatga ozodlikdan mahrum etish jazosi tayinlandi.
Avvalroq O‘zbekistonda aliment to‘lamaganlar avtotransport boshqarish huquqidan vaqtincha mahrum qilinishi taklif etilgani haqida xabar berilgandi.
Shuningdek, Yakkasaroyda alimentdan qarzdor ota ikki farzandiga uy olib bergani, samarqandlik ota 4 nafar voyaga yetmagan farzandi uchun 42 million so‘m aliment pulini birdaniga to‘lab bergani hamda farg‘onalik ota ikki farzandi uchun aliment o‘rniga Spark bergani xabar qilingandi.