Senat raisi tug‘ruqxona shifokorlari orasida qalbaki hujjatlar tayyorlab, chaqaloqni “o‘ldi”ga chiqarayotganlar ham aniqlanayotganini aytdi

Tahlillarga ko‘ra, 2019-yilda chaqalog‘ini sotmoqchi bo‘lgan ayollarning 75 foizi hududiy oilaviy poliklinikalar ro‘yxatidan o‘tmagan. Bu haqda 4-dekabr kuni o‘tkazilgan Odam savdosi va majburiy mehnatga qarshi kurashish Milliy komissiyasining navbatdagi yig‘ilishida ma’lum qilindi, deya xabar bermoqda “Daryo” muxbiri.

Oliy Majlis Senati raisi Tanzila Norboyevaning ta’kidlashicha, chaqaloq savdosi jinoyatlarida tibbiyot xodimlari ham o‘zlarining g‘ayriqonuniy harakatlari bilan ishtirok etishmoqda.

“2019-yilda chaqaloq savdosi jinoyatlarining 12,2 foizi tibbiyot xodimlari vositachiligida amalga oshirilgan. Tergov harakatlari davomida tug‘ruqxona muassasalari shifokorlari tomonidan jinoiy maqsadlarda ayolning homiladorligini yashirish, qalbaki hujjatlar tayyorlash, farzandini o‘ldi deb soxtalashtirish bilan bog‘liq qo‘shimcha jinoyatlar ham aniqlanmoqda”, — dedi komissiya raisi.