Omad hamisha ham kelavermaydi. Zinedin Zidanning “Real”dagi “qora” kunlari haqida

Zinedin Zidan “Real”ga olib bergan ko‘p sonli sovrinlariga qaramay, u bir necha marta ish joyidan haydalish arafasigacha kelgan. Bunga sabab esa jamoaning ketma-ket bir nechta o‘yinlardagi o‘ta qoniqarsiz natijalari bo‘lgan. Ispaniyaning Marca nashri aynan Zizuning “Real”dagi “qora” kunlari haqida maqola tayyorladi. “Daryo” ushbu maqolani o‘quvchilarga o‘zbek tilida taqdim etadi.

2015/16-yilgi mavsum: to‘liq tiklanishgacha bo‘lgan uchta muvaffaqiyatsizlik

“Kastilya”dagi murabbiylikdan so‘ng Zidan darhol “Real”ni qabul qilib oldi. Tabiiyki, bu ko‘pchilikda shu jumladan, klub rahbariyatida ham shubha uyg‘otdi. Fransiyalikni diqqat bilan kuzatib borishdi, uning starti esa kutilganidek, oson kechmadi. Jamoa Zidan boshchiligida “Betis” va “Malaga” bilan durang qayd etdi hamda “Atletiko”dan alamli mag‘lubiyatga uchradi. Ammo shundan so‘ng u jamoani ruhlantira oldi va mavsumni ketma-ket 12 ta g‘alaba bilan yakunladi, shulardan birida “Barselona” “Kamp Nou”da taslim etildi. Shu tariqa “qirollik klubi” so‘nggi pallagacha chempionlik uchun kurash olib bordi.

2015/16-yilgi mavsum: Chempionlar Ligasi chorak finalidagi “Volfsburg”ga qarshi o‘yin

Bu Zidanning Madriddagi faoliyatidagi keskin burilish edi. O‘sha paytga kelib, “qaymoqranglilar” allaqachon Kubok va chempionatdan umid uzib, bor e’tiborini faqat Chempionlar Ligasiga qaratgandi.

Chempionlar Ligasidagi ishtirokni ham muddatdan oldin yakunlash Zidanni ishdan bo‘shatilishiga olib kelishi aniq edi. “Volfsburg”ning 2:0 hisobidagi g‘alabasi esa “Real” va Zidanni karaxt ahvolga solib qo‘ydi. Biroq “Santyago Bernabeu”dagi kambekdan so‘ng “Real” Milandagi final bahsida o‘n birinchi chempionlikni tantana qildi.

2017/18-yilgi mavsumi: ligadagi muammolar, Kubokdagi muvaffaqiyatsizliklar

Zidan jamoasi La Liga tempidan tushib qolgan va sovrinlarga bo‘lgan tashnalik yo‘qdek tuyulardi, fransuzning o‘sha mavsum oxirida klubni tark etishi sabablaridan biri ham shu edi. Bundan tashqari, “Leganes” “qaymoqranglilar”ni Kubok bahslaridan chiqarib yubordi. Shundan so‘nggina yana Chempionlar Ligasi yordamga keldi. Avvaliga 1/8 finalida PSJ mag‘lub etildi, so‘ngra “Yuventus”, “Bavariya” va “Liverpul”. Shu asnoda jamoa Chempionlar Ligasining 13-sovrinini qo‘lga kiritdi.

2019/20-yilgi mavsum: “Atletiko”ga qarshi 3:7 va PSJ bilan 0:3

Zidanning qaytishidan keyingi mavsum darhol natija bermadi. Hammasi mavsumoldi tayyorgarliklardan boshlandi: AQShda “Atletiko”dan 3:7 hisobidagi mag‘lubiyatdan yana Zidanning salohiyatiga shubha qiluvchilar paydo bo‘la boshladi. Shundan so‘ng La Liganing dastlabki uch turida ikkita durang va PSJga 0:3 hisobidagi mag‘lubiyat ro‘y berdi. Zidanga bo‘lgan ishonch esa tobora kamayib borardi. Zizu bu muvaffaqiyatsizliklarga “Sevilya”ni (1:0) mag‘lub etish bilan barham berdi. Shundan so‘ng “Vanda Metropolitano”da 0:0 hisobidagi g‘alabaga teng durang qayd etildi.

2019/20-yilgi mavsum: Yevrokuboklardagi murakkab vaziyat va “Malyorka”dan uchralgan mag‘lubiyat

Birinchi inqirozdan so‘ng ikkinchisi ham yuz berdi: jamoa Chempionlar Ligasining birinchi turida mehmonda PSJga yutqazdi, keyin esa Madridda “Bryugge”ga imkoniyat boy berildi. Bularning barchasi 1/8 finalga chiqish ehtimolini tobora qiyinlashtirardi. Bir necha kundan so‘ng La Ligada “Malyorka” ham “Real”ni mag‘lub etib qo‘ydi. Zidan ishdan bo‘shatilishga juda yaqin keldi, ammo jamoa yana reaksiya ko‘rsatib, Chempionlar Ligasida “Galatasaroy”ga qarshi ikkita “final” o‘yinida g‘alaba qozondi va musobaqadagi holatini yaxshilab oldi. Shuningdek, La Ligada ham mag‘lubiyatsiz seriyalar boshlandi. Saudiya Arabistonida bo‘lib o‘tgan Ispaniya Superkubogidagi g‘alaba esa jamoaning tiklanishida asosiy rolni bajardi.

2019/20-yilgi mavsum: “Levante”, “Manchester Siti” va “Betis”

“Real” uchun 2020-yil ham ko‘ngildagidek boshlanmadi: Ispaniya Kubogida “qirollik klubi” “Sosyedad”ga yutqazdi, “Manchester Siti” (Chempionlar Ligasida) esa “Bernabeu”ga “qaymoqranglilar”ni taslim etib ketdi. Shundan so‘ng ligada ham ikki bor “Levante” va “Betis”ga imkoniyat boy berildi. Biroq COVID-19 pandemiyasi tufayli futbol o‘yinlari to‘xtatildi, bu esa Zidan shogirdlariga tiklanish va La Ligada o‘sish imkonini berdi. “Siti”ga qarshi javob uchrashuvining achchiq natijalariga qaramay, “Real” mavsumni yuqori notada yakunladi, Zizuning mavqeyi esa yana-da mustahkamlandi.

2020/21-yilgi mavsum: “Kadis” va “Shaxtyor”ga qarshi o‘yinlar

Bir necha hafta oldin Zidanning (hozircha) oxirgi inqirozi yuz berdi: La Liga debyutanti “Kadis” va jarohatlar iskanjasida qolgan “Shaxtyor”dan qabul qilingan jiddiy mag‘lubiyatlardan so‘ng yana Zizuning iste’fosi haqidagi taxminlar ilgari surildi. Ammo Zidan bu gaplarga ahamiyat bermay o‘z ishini qilishda davom etdi va yakunda taxminlarni tag-tugi bilan yo‘q qilib tashladi: “Kamp Nou”da “Barselona” dahshatli tarzda taslim etildi, ushbu g‘alabadan ruhlanib, jamoa Chempionlar Ligasi va La Ligadagi o‘rnini ham tiklab oldi.