Ozarbayjonda koronavirus tarqalishining oldini olishga qaratilgan maxsus karantin rejimi 28-dekabrga qadar uzaytirildi. Bu haqda respublika tezkor shtabiga tayanib, “Interfaks” xabar berdi.
Ozarbayjonda virus tarqalishining oldini olish maqsadida maxsus karantin rejimi 28-dekabr soat 06:00 ga qadar uzaytirildi, deyiladi xabarda.
Ma’lum qilinishicha, 21-noyabr soat 00:00 dan 28-dekabr soat 06:00 ga qadar Ozarbayjon hududida jamoat transportlari harakatlanmaydi. Shu sababli Boku metrosining faoliyati ham 28-dekbarga qadar to‘xtatiladi. Bundan tashqari, hujjatda yozilishicha, “21-noyabrdan 28-dekabrga qadar har shanba va yakshanba kunlari butun mamlakat hududida dorixonalar, oziq-ovqat do‘konlaridan tashqari, barcha xizmat ko‘rsatish obyektlari faoliyati to‘xtatiladi”.
Xususiy va davlat korxonalarida ishga chiqadigan xodimlar soni 30 foizga qisqartiriladi.
Koronavirus infeksiyasining tarqalishini oldini olish maqsadida 21-noyabrdan Ozarbayjonda himoya niqoblarini taqish majburiy etib belgilangan.
So‘nggi ma’lumotlarga ko‘ra, mamlakatda koronavirusga chalinganlarning umumiy soni 87 ming kishidan oshgan, virus qurbonlari soni 1079 kishiga yetgan.
Eslatib o‘tamiz, 21-iyundan Ozarbayjonning sakkizta yirik shahrida, jumladan, Bokuda ham ikki haftalik qat’iy karantin boshlangan edi. Avgust oxirida esa alohida karantin rejimi 30-sentabrga qadar uzaytirilgan.
Izoh (0)