Plastik karta hajmidagi to‘laqonli Android smartfon taqdim etildi

Kickstarter kraudfanding maydonchasida 3 dyuymli ekranga ega zamonaviy va qulay Jelly 2 smartfoni paydo bo‘ldi. U ekrani 6 dyuymdan boshlanadigan katta smartfonlarga muqobil sifatida taklif etilmoqda.

Jelly 2 barmoq izi skaneriga ega kichkina plastik korpusga ega. Smartfon o‘lchami bo‘yicha bank kartasidek keladi. Qurilmaning asosiy kamerasi — 16 megapiksell, shuningdek, 8 megapikselli frontal kamera ham mavjud.

Bundan tashqari, smartfon korpusidan qo‘shimcha tugma ham o‘rin olgan bo‘lib, uni istalgan vazifani bajarishga moslashtirish mumkin — kamera yoki biror ilovani ishga tushirish, skrinshot va hokazo.

Qurilma MediaTek Helio P60 protsessorida ishlaydi va unga 6 gigabayt tezkor hamda 128 gigabayt ichki xotira o‘rnatilgan. Akkumulyator sig‘imi 2000 mA/soatga teng bo‘lib, bir marta quvvatlanish orqali ikki sutka ishlay oladi. Hatto NFC moduli bilan jihozlangan smartfon yordamida kontaktsiz to‘lovlarni ham amalga oshirish mumkin.

Kickstarter orqali Jelly 2 modelining dastlabki yuz nusxasi 129 dollardan buyurtma qilingan. Shu sababli hozirda uning faqat 159 dollarlik versiyasiga buyurtmalar qabul qilinmoqda.