Internetda Xiaomi Mi Mix 2020 flagmanining suratlari paydo bo‘ldi

Xiaomi kompaniyasining yangi Mi Mix 2020 flagman smartfoni suratlari internetda paydo bo‘ldi, deb xabar beradi GizChina.

Ma’lumotlarga ko‘ra, Mi Mix 2020 suratlari Xitoydagi yirik savdo maydonchalarida paydo bo‘lgan, biroq ko‘p o‘tmay o‘chirib tashlangan. Ayrim foydalanuvchilar suratlarni saqlab olib, tarqatib yuborishga ulgurgan.

Suratlardan ko‘rish mumkinki, smartfon “qoshsiz” displeyga ega bo‘lgan va burchaklari yoysimon ko‘rinish kasb etgan. O‘ng yon tomonidan esa ikkitalik frontal kamera va ovoz sozlagich tugmalarini payqash mumkin.

Smartfon orqa panelidan markazlashtirilgan to‘rtburchak blok o‘rin olgan bo‘lib, unda kamera moduli joylashgan. Taxminlarga ko‘ra, u to‘rtta obyektivga, periskop modul va uzoqlikni o‘lchovchi lazerga ega bo‘ladi.

Mutaxassislarning ta’kidlashicha, bu turdagi dizaynga ega qurilma bugungi kunda bozorda mavjud emas. Taxminlarga ko‘ra, iPhone 12 Pro shu turdagi kameralar jamlanmasiga ega bo‘ladi.

Avvalroq Xiaomi 57 dollar evaziga Qin AI Life nomli bolalar telefonini hamda hamyonbop Poco M2 Pro modelini taqdim etgani to‘g‘risida xabar berilgandi.