O‘zbekiston xalq shoiri Shukrullo (Yusupov), bugun 19-iyun kuni 99 yoshida Toshkent shahrida vafot etdi. Bu haqda jurnalist Karim Baxriyev ma’lum qildi.
Shukrullo (Yusupov) 1921-yil 2-sentabrda Toshkent shahrining Shayxontohur dahasida tug‘ilgan. Pedagogika bilim yurtini va Nizomiy nomidagi Toshkent pedagogika institutini tugatgan.
Ilk she’rlar to‘plami — “Birinchi daftar”. She’riy asarlar, bolalarga atalgan she’r va ertaklar yozgan. Qatag‘on davri dahshatlari haqidagi “Kafansiz ko‘milganlar” avtobiografik qissasi, “Tirik ruhlar” (1999) roman-xronikasi mashhur.
Shukrulloga O‘zbekiston xalq shoiri, O‘zbekistonda xizmat ko‘rsatgan madaniyat xodimi unvoni berilgan. Alisher Navoiy nomidagi O‘zbekiston Davlat mukofoti laureati. “Do‘stlik” va “El-yurt hurmati” ordenlari bilan mukofotlangan. “Turk dunyosida yilning adabiyot kishisi 2016” mukofoti bilan ham taqdirlangan.
Shukrulloning “Kafansiz ko‘milganlar” asarida Sho‘ro davrining yetmish yili mobaynida ommaviy ikkiyuzlamachilik ro‘y bergani dadil fosh etilgan.
Izoh (0)