Turkmanistonda barcha masjidlar yopilib, poyezdlar harakati to‘xtatildi. Mamlakatda koronavirus rasman qayd etilmagan

Turkmanistonda masjidlar, cherkovlar va boshqa ibodat muassasalari hamda ziyoratgohlar vaqtinchalik yopildi. “RIA Novosti”ning yozishicha, mamlakatning Din ishlar bo‘yicha kengashi muassasalar virusli infeksiyalar tarqalishiga qarshi profilaktika ishlari olib borish uchun yopilganini ma’lum qilgan.

Avvalroq “TASS” xabar berganidek, Turkmaniston temiryo‘llari mamlakatda 16-iyuldan 23-iyulga qadar poyezdlar harakati vaqtinchalik to‘xtatilganini ma’lum qilgandi. Shuningdek, bir qator viloyatlarda shaharlararo avtobus qatnovi to‘xtatilgan.

Bundan tashqari, “Turkmenistan segondya” nashrining yozishicha, havoda “chang zarralari miqdori oshganligi” aniqlangani uchun barcha hududlarda dezinfeksiyalash bo‘yicha kompleks ishlar olib borilmoqda. Ta’kidlanishicha, bu “bugungi kunda butun insoniyat uchun jiddiy tashvish tug‘dirayotgan yuqumli kasalliklar tarqalishining oldini olish uchun” amalga oshirilmoqda.

Poytaxt Ashxobodda restoran va kafelar yopilgan, butun mamlakat bo‘ylab esa niqob rejimi joriy etilgan.

Eslatib o‘tamiz, Turkmanistonda koronavirus rasman qayd etilmagan. Mamlakatda 6-iyuldan 15-iyulgacha Jahon sog‘liqni saqlash tashkiloti missiyasi tekshiruv o‘tkazdi. Tashrif yakunlariga bag‘ishlangan brifingda missiya rahbari Ketrin Smolvud mamlakat Sog‘liqni saqlash vazirligiga tayangan holda Turkmanistonda COVID-19 infeksiyasiga chalinish holati borligini tasdiqlamagan.