Koronavirusga chalingan Madaniyat vazirligi xodimi Akmal Irisov 18-iyul kuni vafot etdi. Bu haqda vazirlik matbuot xizmati xabar berdi.
Ma’lum qilinishicha, Akmal Irisov 1988-yilda Samarqand viloyati Payariq tumanida tug‘ilgan. Ayni paytgacha u Madaniyat vazirligining Iqtisodiy tahlil, moliya va buxgalteriya boshqarmasi bosh mutaxassisi lavozimida ishlab kelgan.
Ta’kidlanishicha, shifokorlar tomonidan unga o‘tkir nafas yetishmovchiligi, ikki tomonlama pnevmoniya, COVID-19 tashxislari qo‘yilgan.
“Madaniyat vazirligi tomonidan uning oila a’zolari va yaqinlariga ta’ziya izhor etib, chuqur hamdardlik bildiramiz”, — deyiladi xabarda.
Avvalroq Toshkentda koronavirusga chalingan 67 yoshli erkak vafot etgan edi. Marhum Sog‘liqni saqlash vazirligi hisob-kitobi bo‘yicha mamlakatda koronavirusning 80-qurboniga aylangan.
“Daryo” hisobi bo‘yicha koronavirus asoratlaridan vafot etganlar soni 82 nafarga yetdi. 15-iyul kuni Davlat xizmatlari agentligi o‘z Telegram kanali orqali agentlikning Navoiy viloyati boshqarmasining mas’ul xodimi Adhamjon Dehqonovning koronavirus asoratlari oqibatida vafot etganini xabar qilgandi. Ushbu o‘lim holati va Madaniyat vazirligi xodimining vafoti Sog‘liqni saqlash vazirligi tomonidan hozircha tasdiqlanmagan.
Eslatib o‘tamiz, 17-iyul kuni Sog‘liqni saqlash vazirligi taqdim etib kelayotgan rasmiy statistikaga ko‘ra besh nafar odam COVID-19 kasalligi oqibatida vafot etdi. Shuningdek, 17-iyul kuni taniqli rejissor Sarvar Karimov Twitter’dagi sahifasida o‘zi va oila a’zolari koronavirus infeksiyasiga chalingani, otasi COVID-19’dan vafot etganini ma’lum qilgan.
Izoh (0)