Hindiston Oliy sudi Kerala shtatida joylashgan va dunyodagi eng boy ibodatxona sanaladigan Shri Padmanabxasvamini mahalliy rojalarning avlodlariga qaytardi. Bu haqda Meduza xabar berdi.
Foto: Reuters
Shu tariqa, Hindiston Oliy sudi Kerala shtati oliy sudining 2011-yilda qabul qilingan qarorini bekor qildi. 2011-yildagi qaror asosida ibodatxona Kerala shtati hokimiyatiga berilgandi.
Ibodatxona qadimiy Travankor rojaligi hukmdorlarining avlodlariga qaytarildi, ular esa ibodatxona xazinasini saqlash bo‘yicha qo‘mita tuzishi kerak bo‘ladi. Sulolaning vakillari boylikka egalik qilish huquqiga ega emasligini, chunki u “xudoga tegishli ekanligini” ma’lum qilgan.
Kerala shtati rasmiylari esa Oliy sud qarori ustidan shikoyat qilmasligini bildirgan.
Shri Padmanabxasvami ibodatxonasi VI asrda qurilgan va XVIII asrda Travankor rojaligi hukmdorlari tomonidan qayta qurilgan. Rojalik Kerala va Travankor shtatlarining hozirgi hududlari bir qismini egallagan hamda XVIII asrdan 1940-yillargacha mavjud bo‘lgan.
Travankor rojaligi hukmdorlarining avlodlari va ularning vakillari rojalik tugagandan keyin ham ibodatxonani boshqarishda davom etgan. 2000-yillarda ular ibodatxona butunligini saqlay olmaganlikda ayblangan. Sudga ularni ibodatxona boshqaruvi huquqidan mahrum etish bo‘yicha da’vo kelib tushgan.
2011-yilda ibodatxona omborlarida inventarizatsiya o‘tkazilgan. Ularda oltin, kumush va qimmatbaho toshlardan yasalgan buyumlar topilgan, topilmalarning qiymati taxminan 2 milliard dollarga baholangan. Shri Padmanabxasvami dunyodagi eng boy hinduiylik ibodatxonasi sifatida Ginnesning rekordlar kitobiga kirgan.
