O‘zbekistonda 12-iyul soat 17:00 holatiga ko‘ra rasman 5073 kishi koronavirusdan davolanmoqda. Bu haqda Sog‘liqni saqlash vazirligi xabar berdi. Qayd etish joiz, jami kasallanish holatlari soni 12 855 taga yetgan.
“Hozirda mamlakatimizda 5073 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda”, — deyiladi vazirlik axborotida. Ularning qanchasi og‘ir va o‘ta og‘ir ahvolda ekaniga aniqlik kiritilmagan. Soat 10:00 dagi axborotda 45 nafar bemorning ahvoli og‘ir, 7 nafariniki esa o‘ta og‘ir ekani ma’lum qilingan edi.
Shu bilan birga, ushbu bemorlarning qanchasida kasallik alomatsiz kechayotgani ham ma’lum qilinmagan. Ma’lumot uchun, 5-iyuldan boshlab O‘zbekistonda koronavirus infeksiyasi alomatsiz kechayotgan bemorlar uy sharoitida davolanishi mumkin, ushbu yo‘nalishda yo‘riqnoma va eslatmalar ham e’lon qilingan.
Avvalroq Respublika maxsus komissiyasi 10-iyul holatiga ko‘ra, O‘zbekistonning mavjud sog‘liqni saqlash muassasalari quvvati koronavirusga chalingan yangi bemorlarni qabul qilish uchun yetarli emasligi, “tizimni qayta tiklash” uchun 1-avgustgacha kuchaytirilgan karantin tartibi qaytadan joriy etilganini ma’lum qilgan edi. O‘sha vaqtda koronavirusdan davolanayotgan bemorlar soni rasman 3986 nafar edi.Sog‘liqni saqlash vaziri Alisher Shodmonovning fikricha, O‘zbekistonda koronavirus hali eng yuqori cho‘qqisi chiqmagan. Professor Habibulla Oqilovning ta’kidlashicha, agar O‘zbekistonda kuniga 1—1,5 mingta kasallanish holati aniqlansa, sog‘liqni saqlash tizimimiz “qo‘shni mamlakatlarniki kabi” qulaydi.
E’tiborga molik tomoni, professor Oqilov 8-iyul kuni qilgan chiqishida O‘zbekiston sog‘liqni saqlash tizimidagi resurslar “poyoniga yetgani”, bo‘sh koyka-o‘rinlar qolmaganini ma’lum qilgan edi. 9-iyuldagi brifingda esa Oqilov “koyka-o‘rinlar, dori zaxirasi mavjud”ligini, tizim “har qancha bemorni qabul qila olishi”ni ta’kidladi.
Izoh (0)