Tesla kapitalizatsiyasi 190 milliard dollarlik marrani zabt etib, dunyodagi eng qimmat avtomobil kompaniyaga aylandi, deb xabar beradi Bloomberg.
Taqqoslash uchun, ikkinchi o‘rindagi Toyota kapitalizatsiyasi 182 milliard dollarni, Volkswagen’niki esa 75 milliard dollarni tashkil etadi.
Ro‘yxatning to‘rtinchi pog‘onasidan 48 milliard dollar bilan Honda o‘rin olgan bo‘lsa, kuchli beshlikka Daimler AG (41 milliard dollar) yakun yasagan.
Tesla kompaniyasining aksiyalari 10-iyun kuni savdolarda donasi uchun 1000 dollardan qimmatroqqa baholangan va 1025 dollarlik rekord ko‘rsatkichni qayd etgan. Yil boshida aksiyalarni 420 dollar evaziga xarid qilish mumkin edi. Shunday qilib, Tesla aksiyalariga egalik qiluvchilarning kapitali qariyb 2,5 barobarga ko‘paydi.
Tahlilchilar Tesla aksiyalarining qimmatlashishini Xitoyda elektromobillarga bo‘lgan talabning qayta yuzaga kelgani bilan bog‘lamoqda. Shuningdek, brendning Shanxayda ochilgan zavodi ham muhim rol o‘ynamoqda, u yerda 2020-yil oxiriga qadar 100 mingta mashina yig‘ilishi kerak.
Avvalroq Apple va Microsoft kapitalizatsiyalari 1,5 trillion dollarlik marrani zabt etgani haqida xabar berilgandi.
Izoh (0)