Xiaomi kompaniyasi Smart Lock E nomli “aqlli” qulfni taqdim etdi. Mazkur ixtironi jamoaviy moliyalashtirish bosqichida 126 dollar evaziga xarid qilish mumkin, keyinchalik narxi 140 dollarga qadar ko‘tariladi, deb xabar beradi IXBT.

Foto: IXBT

Xiaomi Smart Lock E “aqlli” qulfi olti turdagi blokdan chiqarish funksiyasiga ega, jumladan, barmoq izi skaneri, parol, vaqtincha parol, Bluetooth, Homekit va avariya kaliti. U daktiloskopik datchik bilan jihozlangan. Kompaniyaning ta’kidlashicha, yangi datchik 98,5 foiz aniqlikda ishlaydi.

Qurilma Homekit’ni qo‘llab-quvvatlagani sabab uni iPhone, iPad, hatto Apple Watch yordamida boshqarsa bo‘ladi. Bundan tashqari, qulf ovozli buyruq yordamida ham ishlaydi. Masalan, mehmon kelganda “Hoy Siri, eshikni och” deyish kifoya.

Xiaomi Smart Lock E sakkizta akkumulyator yordamida 18 oyga qadar ishlaydi. Akkumulyator zaryadi 20 foizdan pastga tushsa, qulfdagi qizil yorug‘lik diod lamasi yonib, uni quvvatlantirish lozimligini eslatadi. Qulfning pastki qismida USB-C avariya quvvatlantirish moduli joylashgan.