Sud iPhone qurilmalari ishini “sirli ravishda sekinlashtirish”da ayblanayotgan Apple o‘z foydalanuvchilariga 500 million dollar kompensatsiya to‘lash borasidagi istagini ma’qulladi, deb xabar beradi IXBT.
Okrug sudi Edvard J.Devil bu boradagi dastlabki rozilikni bergan, biroq yakuniy muddatni pandemiya sabab uzaytirish niyatida ekanligini ma’lum qilgan. Apple huquqshunoslariga vaziyatni tartibga solish bo‘yicha yangi muddatni taklif etish topshirilgan, taxminlarga ko‘ra, bu dekabrga to‘g‘ri keladi.
Agarda kelishuv ma’qullansa, u Apple’ga qarshi ilgari surilib, 2018-yilning mayida yagona guruh da’vosiga birlashgan o‘nlab sud da’volariga yakun yasaydi. Apple’ga qarshi da’vo arizalari kompaniya iPhone smartfonlari ishini sekinlashtiruvchi dasturiy ta’minotni chiqarganini tan olganidan so‘ng berilgan edi. Eski model to‘saddan o‘chib qolmasligi uchun ularning ish qobiliyati va akkumulyator tejamkorligi pasaytirilgan.
Oxir-oqibat Apple foydalanuvchilarni ogohlantirmagani uchun kechirim so‘ragan va akkumulyatorlarni almashtirish bo‘yicha dasturni ishga tushirib, uning narxini 29 dollar etib belgilagan. Kompaniya iOS 11.3 versiyasida foydalanuvchilar o‘z batareyalarining holatini ko‘rishga imkon beradigan, shuningdek, ishchanlik qobiliyatini pasaytirish funksiyasini o‘chirib qo‘yadigan yangilikni taqdim etgan.
Kelishuv ma’qullanadigan bo‘lsa, jabr ko‘rgan har bir iPhone egasiga 25 dollardan kompensatsiya to‘lanadi. Yakuniy mablag‘ murojaatchilarning soniga qarab ortishi yoki kamayib ketishi mumkin.
Gap iPhone 6, 6 Plus, 6s, 6s Plus, 7, 7 Plus va SE smartfonlari haqida ketmoqda.
Izoh (0)