Ispaniya qiroli Filipp VI ning qarindoshi Mariya Tereza Burbon-Parma Parijda 86 yoshida koronavirusdan vafot etdi, deb xabar bermoqda “RIA Novosti”.
Uning o‘limi haqida marhumaning akasi Sikst-Genrix Burbon-Parma o‘zining Facebook’dagi sahifasida ma’lum qilgan. Qayd etilishicha, malika yakka o‘zi yashagan bo‘lsa ham kasallik yuqtirib olgan. Uning dafn marosimi 27-mart kuni o‘tkazilgan.
Ma’lumot uchun, Mariya Tereza Burbon-Parma turmushga chiqmagan, farzandlari ham yo‘q.
Ayni paytda Ispaniya koronavirusga chalinganlar soni bo‘yicha Yevropada Italiyadan keyin ikkinchi o‘rinda bo‘lib turibdi. Mamlakatda kasallanganlar soni 64 ming kishidan oshib ketgan, 4 900 kishi vafot etgan. Ispaniya hukumati 14-martdan boshlab odamlar harakatlanishini cheklagan holda 15 kunlik kuchaytirilgan tartib joriy etgandi. 26-mart kuni parlament bu muddatni 11-aprelgacha uzaytirdi.
So‘nggi ma’lumotlarga ko‘ra, butun dunyo bo‘ylab COVID-19 koronavirusi bilan kasallanganlar soni 597,3 ming kishiga yetgan. Vafot etganlar soni esa 27,3 ming kishidan oshib ketdi. O‘zbekistonda esa koronavirus bilan kasallanganlar soni 104 kishiga yetdi.Mavzuga doir: Italiyada koronavirus oqibatidagi o‘limlar soni bo‘yicha kunlik antirekord yangilandi — bir sutkada 969 bemor vafot etdi
