AOKAda 6-mart, juma kuni, Monopoliyaga qarshi kurashish qo‘mitasi mutasaddilari ishtirokida matbuot anjumani tashkil etildi. Unda qo‘mita rahbariyati jurnalistlar tomonidan berilgan savollarga atroflicha javob qaytardi.
“Daryo” muxbiri Mirolim Isajonovning xabar berishicha, qo‘mita raisi Najmiddin Sharipov ijtimoiy tarmoqlarda Humo kartasiga o‘tishga majburlanayotganini bayon etayotgan xodimlar e’tiroziga o‘z munosabatini bildirdi.
“Humo’ning iste’molchisi bank emas, balki ish beruvchi sanaladi. U xodimlari ish haqini qaysi tizim orqali tushurishni o‘zi hal qiladi. Bank vakili tadbirkorga xizmat ko‘rsatadi, xolos. Qaysi plastik karta tizimini tanlash ishbilarmon ixtiyorida. Barcha banklarda Humo ham, Uzcard ham ishlaydi.
Tashkilot, korxonalarning oddiy xodimlari rahbariyat tomonidan qanday plastik karta berilsa, o‘shani ishlatishga majbur. Bu masalani ular emas, rahbari hal etadi. Humo tizimiga o‘tgan va e’tiroz bildirayotgan ishchilar noroziliklari orqali biror narsaga erisholmaydi. Barchasi ularning rahbariga bog‘liq. Chunki ish beruvchi bank bilan shartnoma tuzayotganda, xizmat ko‘rsatish turlari ma’qul kelgan plastik kartadan birini o‘z xohishiga ko‘ra tanlaydi.
Agar tadbirkor yoki ish beruvchilar Humo’ga o‘tishga majburlanayotgan bo‘lsa, bizga murojaat qilishsin. Biz bunday holatlarni o‘rganib chiqib, tegishli choralarni ko‘ramiz”, — dedi Sharipov.
Izoh (0)