Bolalar hayoti uchun dunyoda eng yaxshi sharoit Norvegiya, Janubiy Koreya va Niderlandiyada, eng yomoni esa Markaziy Afrika Respublikasi, Chad va Somalida ekani ma’lum bo‘ldi. Bu haqda UNICEF saytida joylashtirilgan “Dunyo bolalari uchun kelajak” deb nomlangan ma’ruzada keltirilgan.
Unga ko‘ra, bolalarning kelajagi uchun eng yaxshi sharoitlar Norvegiya, Janubiy Koreya, Niderlandiyada yaratilgan. Yetakchi o‘ntalikdan Fransiya, Irlandiya, Daniya, Yaponiya, Belgiya, Islandiya, Britaniya ham o‘rin olgan.
Eng yomon sharoitlar esa Somali, Chad, Markaziy Afrika Respublikasida deb keltirilgan.
Bunda ekspertlar duyoning 180 mamlakatida bolalar uchun sharoitlarni taqqoslab, ularning yashashi va ravnaq topishi uchun yaratilgan sharoitlar, jumladan, davlatning sog‘liqni saqlash, ta’lim tizimlari rivojlanishi, ekologiyasi, iqtisodiyotini tahlil qilgan.
Reytingda O‘zbekiston 180 ta davlat ichida 71-o‘rinni egallagan. Ekspertlar O‘zbekistonni past-o‘rta daromadli davlat deb baholagan.
Shuningdek, Markaziy Osiyo davlatlaridan Turkmaniston 52-o‘rinni, Qozog‘iston 59-o‘rinni, Qirg‘iziston 96-o‘rinni, Tojikiston 98-o‘rinni egallagan.
Izoh (0)