Moskvadagi ko‘p qavatli uylarning birida mumiyolangan odam murdasi topildi

Besh yil oldin vafot etgan, mumiyolangan odam jasadi Moskva markazidagi xonadondan topilgan, deb yozmoqda “RIA Novosti”.

Taxminlarga ko‘ra, erkak 2014-yil dekabr oyida vafot etgan. Tergovchilar holat yuzasidan surishtiruv va tekshiruv ishlarini boshlagan.

Qo‘shnilarning hikoya qilishicha, ko‘p qavatli uyning yo‘laklarida uch-to‘rt yildan beri qo‘lansa hid bo‘lgan. Ular ushbu hid it boquvchi xonadon egalarining hayvonlaridan anqiydi deb hisoblagan. Keyinchalik bunga itlar sabab emasligi aniqlangach, politsiyaga murojaat qilingan. Yakunda kvartirada o‘lgan markizning jasadi borligi ma’lum bo‘lgan.

Markizning qarindoshlari u ruhiy sog‘lom bo‘lmaganini bildirgan. U o‘zini ta’qib qilishayotgani haqida ko‘p gapirgan. Shu sababli 10 yil davomida yaqinlari bilan umuman muloqot qilmagan. Olimning oilasi ham farzandlari ham bo‘lmagan.

Sergey Dmitriyevich ilm-fan bilan mashg‘ul bo‘lgan va Bauman nomidagi Moskva davlat texnika universitetida avtomatik boshqaruv kafedrasida ishlagan. Dotsent ilmiy unvoniga ega olimni hamma hurmat qilgan.

Marhumning bobokaloni — Lui de Lafit de Pelpor (Parijda ushbu oqsuyaklar familiyasi nomi bilan atalgan metro bekati ham bor) hisoblanadi. Napoleon Rossiyaga yurish qilgan vaqtda Lui Vitebsk bo‘yida yaralangan va asirga tushgan. Markiz urushdan so‘ng Rossiyada yashab qolgan va bu yerda nemis ayoliga uylangan.