Kecha, 3-fevral kuni Novosibirsk—Tyumen aviareysida uchgan Xitoy fuqarosida koronavirus aniqlangan, natijada Nur-Sulton—Novosibirsk—Tyumen reysining barcha yo‘lovchilari (ularning orasida O‘zbekiston fuqarolari ham bor) kasalxonalarga joylashtirilgan, O‘zbekiston TIV ham bu ma’lumotni tasdiqlagan edi.
Nur-Sulton shahridan Tyumenga uchgan samolyot yo‘lovchilari qatoriga Novosibirsk shahrida Xitoy fuqarosi qo‘shiladi. Oradan 3 kun o‘tib, uning koronavirusga chalingani aniqlangan. Shundan so‘ng Rossiya hukumati mazkur virusning tarqalishiga qarshi kurashish maqsadida Nur-Sulton—Novosibirsk—Tyumen aviareysida parvoz qilgan barcha yo‘lovchilar bilan bog‘lanib, ularni tibbiy tekshiruvdan o‘tkazishga kirishgan.
“Hozirda Nur-Sulton—Novosibirsk—Tyumen aviareysida parvoz qilgan barcha yo‘lovchilar qatori o‘zbekistonliklar ham tibbiy tekshiruvdan o‘tkazilgan. Tahlillar o‘zbekistonliklarning birida koronavirus uchramaganini tasdiqladi, qolgan 2 nafar fuqaro esa tahlil natijalarini kutmoqda. Biroq ularning hech birida koronavirus belgilari (yo‘tal, tana haroratining ko‘tarilishi, qusish, diareya, o‘pka yetishmovchiligi) kuzatilmagan”, — deyiladi vazirlik xabarida.
Eslatib o‘tamiz, Uzbekistan Airways kompaniyasi O‘zbekiston Prezidentining buyrug‘iga binoan, tashkil etilgan hukumat komissiyasining qaroriga asosan, joriy yilning 4—5-fevral kunlari Xitoydagi O‘zbekiston fuqarolarini evakuatsiya qilish uchun uchta charter reysini amalga oshirilishini tasdiqlagan. Sanitar-epidemiologik osoyishtalik agentligi Xitoydan kelgan O‘zbekiston fuqarolari 14 kun muddatga tibbiy nazoratga olinganini xabar qilgan.
Shuningdek, Tashqi ishlar vazirligi aviaqatnovlar bekor qilingani sababli Pekin aeroportida qolib ketgan 3 nafar o‘zbekistonlik talabaga yordam ko‘rsatilishini ma’lum qilib, talabalar bilan aloqa o‘rnatib, muammoni hal qilish bo‘yicha diplomatlar tegishli choralarni ko‘rayotganini e’lon qildi.
Izoh (0)