Peterburgda o‘zbekistonlik haydovchi 50 nafar yo‘lovchini avtobusdagi yong‘indan qutqarib qoldi

Sankt-Peterburg yaqinidagi Olgino qishlog‘ida ichida 50 nafarga yaqin yo‘lovchi bo‘lgan Dragon rusumidagi avtobus yo‘lda yonib ketdi, deb xabar bermoqda Regnum.

Qayd etilishicha, voqea 1-dekabr kuni soat 12:21 larda ro‘y bergan. Avtobus Sankt-Peterburgdan Zelenogorskka ketayotgan bo‘lgan. Haydovchi dvigatel bo‘linmasida tutunni sezgach, avtobusni to‘xtatib, odamlarni tushirgan. Avtobus esa butunlay yonib ketgan.

Voqea aks etgan video VKontakte ijtimoiy tarmog‘idagi “DTP i CHP Sankt-Peterburg” guruhida e’lon qilingan.

Ma’lumotlarga ko‘ra, yo‘lovchilarni qutqarib qolgan haydovchi kelib chiqishi o‘zbekistonlik 43 yoshli erkak bo‘lib, avtobus tegishli bo‘lgan “Tretiy park” korxonasida 3 yildan buyon ishlab keladi.

Ayni paytda voqea yuzasidan tekshiruv ishlari olib borilmoqda.