29-oktabr, seshanba kuni Samarqand shahri Zafar ko‘chasida joylashgan 4-uyning 7-xonadonida yong‘in sodir bo‘ldi. Bu haqda Davlat yong‘in xavfsizligi xizmati xabar berdi.
Bu haqda soat 08:17 da shahar yong‘in xavfsizligi boshqarmasiga xabar kelib tushgan. Yong‘inga ikkita yong‘in o‘chirish texnikasi jalb etilgan. Voqea joyiga besh daqiqada yetib borgan yong‘in o‘chiruvchilarning tezkor harakatlari natijasida yong‘in soat 08:25 da o‘rab olingan va soat 08:50 da bartaraf etilgan.
Yong‘in oqibatida yashash uyi oshxonasining 15 kvadrat metr maydonda ichki jihozlari yonib zararlangan. Yong‘inni bartaraf etish vaqtida 1952-yilda tug‘ilgan uy bekasi fuqaro R.G.ning kuygan jasadi topilgan.
Hodisaning kelib chiqish sababi yuzasidan dastlabki surishtiruv ishlari olib borilganda, yuqorida ko‘rsatilagan manzilda gaz uskunalarini o‘rnatish qoidalari buzilganligi ma’lum bo‘lgan.
Yong‘inga xonada to‘planib qolgan tabiiy gazning elektr tarmog‘idan foydalanish oqibatida portlashi sabab bo‘lgani aytilmoqda.
Hodisa yuzasidan tergovga qadar tekshiruv ishlari olib bormoqda.
Izoh (0)