Toshkentning Mirzo Ulug‘bek tumanidagi qator maktablarda O‘zbekiston Prezidenti tomonidan belgilab berilgan yoshlarda harbiy vatanparvarlik ruhini tarbiyalash borasidagi vazifalar ijrosi yuzasidan ijodiy uchrashuvlar o‘tkazildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.

Xususan, tumandagi 222 va 256-sonli umumta’lim maktablariga O‘zbekiston davlat san’at va madaniyat instituti talabalarining tashrifi amalga oshirildi. Mudofaa vazirligining mas’ul ofitserlari hamrohligidagi bu uchrashuvlar maktab jamoasi va o‘quvchilar uchun haqiqiy san’at kuniga aylandi.

“Biz shaharda tug‘ilib, shu yerda voyaga yetyapmiz. Shu paytgacha xalq amaliy cholg‘u asboblari haqida ko‘p narsa bilmasdik. Baxshichilik asosan vohada rivojlangan. Televizorda ularni ko‘rganman; tog‘u adirlar qo‘ynida doston aytishadi. Shaharda, ko‘p qavatli binolar atrofida doston aytilayotganini esa ko‘rmaganman. Bugun ilk bor doston aytayotgan baxshi, chanqovuz ovozini eshitdim”, — deydi 222-maktabning 10-sinf o‘quvchisi Kamolaxon Azimova.

Uchrashuvda xalq dostonlaridan termalar aytildi. Estrada yo‘nalishidagi zamonaviy ashulalarning baxshichilar tilidan, ular ohangida jarang sochgani esa o‘quvchilar uchun yangilik bo‘lib, iliq kutib olindi.

Shu kunning o‘zida bu kabi tadbirlar tumanning 18 ta umumta’lim maktabida o‘tkazilib, Mudofaa vazirligi sport klubi sportchilari va harbiy xizmatchilar tomonidan sport bo‘yicha ham o‘quvchilar o‘rtasida musobaqalar tashkillashtirildi.