Janubiy Koreyaning Samsung Electronics texnologik korporatsiyasi Xitoyda o‘z smartfonlarini ishlab chiqarishni to‘xtatishga qaror qildi, deb xabar beradi “Reuters”.
Mazkur qaror mahalliy smartfon ishlab chiqaruvchilar bilan kuchli raqobat, Xitoy iqtisodiyotning sekinlashuvi, shuningdek, Xitoy va AQSh o‘rtasida davom etayotgan savdo urushi fonida qabul qilingan.
Samsung Guandun provinsiyasining Xoychjou shahrida joylashgan so‘nggi zavodida ishlab chiqarishni to‘xtatadi. O‘tgan yili Xitoydagi boshqa zavodlari faoliyatini to‘xtatgan korporatsiya yoz oyida Xoychjoudagi zavodida ishlab chiqarish va xodimlarni qisqartirishini ma’lum qilgandi.
Counterpoint kompaniyasining ma’lumotlariga ko‘ra, Samsung’ning Xitoy smartfonlar bozoridagi ulushi birinchi chorakda 1 foizga qadar tushib ketgan (2013-yilda ushbu ko‘rsatkich 15 foizni tashkil etgan). “Xitoyda odamlar mahalliy brenddagi hamyonbop smartfonlarni hamda Apple yoki Huawei’ni xarid qilmoqda. Samsung’da ushbu mamlakatdagi o‘z ulushini qayta tiklab olish imkoniyati juda past”, — deydi Cape Investment & Securities kompaniyasi tahlilchisi Pak Son Sun.
