Uyida fohishaxona tashkil etgan shaxsga nisbatan Navoiy shahar sudining ochiq sayyor sud majlisida jinoyat ishi ko‘rib chiqildi. Bu haqda Oliy sud Axborot xizmati xabar berdi.
Xabarga ko‘ra, vaqtincha ishsiz bo‘lgan Samad Zafarov (ism-shariflar o‘zgartirilgan) g‘arazli va past niyatda fohishaxona tashkil etgan.
U 2019-yil 2-avgustda o‘zi ijarada yashab kelayotgan Navoiy shahridagi xonadonlarning birida 100 ming so‘m pul evaziga Sh.A. hamda K.S.ga intim aloqa qilishlari uchun uyidan alohida xona ajratib, ularga shart-sharoit yaratib bergan vaqtida Navoiy shahar Ichki ishlar organlari faoliyatini muvofiqlashtirish boshqarmasi xodimlari tomonidan o‘tkazilgan tadbirda qo‘lga tushgan. 100 ming so‘m miqdoridagi pullar xolislar ishtirokida ashyoviy dalil sifatida olingan.
Sudlanuvchi S. Zufarov sud majlisida aybiga iqrorlik bildirmagan, Sh.A. va K.S. tanishlari ekani, ular bilan birga shunchaki o‘tirib spirtli ichimlik iste’mol qilganini vaj qilib, yoshi hamda oilaviy sharoitini inobatga olib, suddan yengillik so‘ragan.
Sud majlisida uning aybi tekshirilgan va to‘plangan dalillar yig‘indisi bilan to‘liq isbotlandi. S. Zafarov avval ham shunga o‘xshash jinoyat sodir etgani va boshqa barcha holatlarni inobatga olib sudlanuvchiga O‘zbekiston Respublikasining Jinoyat kodeksi 131-moddasi 2-qismida nazarda tutilgan jinoyatni sodir etgani uchun 1 yilu 6 oy ozodlikni cheklash jazosi tayinlandi.
Izoh (0)