Misr O‘zbekiston mahsulotlarining Afrikaga eksportini oshirish uchun o‘z imkoniyatlarini taklif qildi

O‘zbekiston tashqi ishlar vazirining o‘rinbosari Dilshod Ahatov boshchiligidagi delegatsiya Qohiraga tashrifi doirasida 15-sentabr, yakshanba kuni Misr savdo va sanoat vazirining birinchi o‘rinbosari Ahmad Antar hamda investitsiyalar va xalqaro hamkorlik vazirining o‘rinbosari Reda Bebars bilan ikki tomonlama uchrashuvlar o‘tkazdi.

Uchrashuvda Savdo-iqtisodiy, ilmiy-texnikaviy hamkorlik bo‘yicha O‘zbekiston—Misr hukumatlararo komissiyasining 7-majlisi doirasida biznes forumini o‘tkazish, shuningdek, ikki mamlakat tadbirkorlarining Ishbilarmonlar kengashini tashkil etish masalalari ko‘rib chiqilgan, deya xabar bermoqda O‘zbekiston Tashqi ishlar vazirligi matbuot xizmati.

Misr tomoni O‘zbekiston mahsulotlari eksport hajmini oshirish uchun Misrning Afrika va Yaqin Sharq mamlakatlari bilan amaldagi erkin savdo rejimida berilgan imkoniyatlardan foydalanishni taklif qilgan.

Bundan tashqari, Misr xalqaro savdo tizimi Tariflar va Savdo bo‘yicha Bosh Bitim/Jahon savdo tashkilotining asoschisi sifatida O‘zbekistonning JSTga kirish masalasida har tomonlama yordam berishga tayyorligi ma’lum qilingan.